કેરળ :  કેરળ વિધાનસભા ચૂંટણીની રણભેરી વાગી રહી છે ત્યારે કોંગ્રેસના તેજતર્રાર સાંસદ શશિ થરૂરના એક પગલાએ દિલ્હીથી તિરુવનંતપુરમ સુધી રાજકીય ખળભળાટ મચાવી દીધો છે. શુક્રવારે જ્યારે દિલ્હીમાં કોંગ્રેસ હાઈકમાન્ડ કેરળની ચૂંટણી વ્યુહરચના ઘડવા બેઠક કરી રહ્યું હતું, ત્યારે તેના સૌથી પ્રભાવશાળી ચહેરા ગણાતા શશિ થરૂર ગેરહાજર રહ્યા હતા. તેની પાછળનું કારણ માત્ર પીએમ મોદીનો કાર્યક્રમ હોવાનું કહેવામાં આવે છે, પરંતુ રાજકીય પંડિતો આને રાહુલ ગાંધી સાથેની વધતી જતી ખાઈ તરીકે જોઈ રહ્યા છે. કોચીમાં આયોજિત મહાપંચાયતમાં રાહુલ ગાંધીએ પોતાના ભાષણમાં થરૂરના નામનો ઉલ્લેખ પણ ન કર્યો અને પ્રોટોકોલના ભંગને કારણે થરૂર ભારે નારાજ હોવાનું મનાય છે.

તિરુવનંતપુરમમાં વડાપ્રધાન નરેન્દ્ર મોદીના રોડ શો અને વિકાસ કાર્યોના લોકાર્પણ સમયે શશિ થરૂરની હાજરીએ અનેક અટકળોને જન્મ આપ્યો છે. એક તરફ રાહુલ ગાંધીથી અંતર અને બીજી તરફ પીએમ મોદીના કાર્યક્રમમાં સક્રિયતાએ કોંગ્રેસ કાર્યકરોમાં ગૂંચવણ ઊભી કરી છે. જોકે, કોંગ્રેસના સૂત્રોએ આ મામલે ડેમેજ કંટ્રોલ કરતા જણાવ્યું છે કે થરૂરે પૂર્વ મંજૂરી મેળવી હતી, પરંતુ સત્ય એ છે કે કોચીના કાર્યક્રમમાં બેઠક વ્યવસ્થા અને વક્તાઓના ક્રમમાં જે રીતે થરૂરને ગૌણ રાખવામાં આવ્યા, તેનાથી તેમની વરિષ્ઠતા અને સ્વાભિમાન પર ઠેસ પહોંચી છે.

બીજી તરફ, વડાપ્રધાન મોદીએ કેરળમાં 'વિકસિત કેરળ'નો નારો આપીને રાજ્યમાં ડાબેરી અને કોંગ્રેસના ગઠબંધન પર પ્રહારો કર્યા છે. પીએમ મોદીએ અંગ્રેજીમાં "હવે NDA સરકારનો સમય છે" કહીને ભાજપનો પક્ષ મજબૂત કર્યો હતો. થરૂરની ગેરહાજરી અને પીએમની હાજરી વચ્ચે કેરળનું રાજકારણ હવે નવા સમીકરણો તરફ ઈશારો કરી રહ્યું છે. જો કોંગ્રેસ હાઈકમાન્ડ થરૂર જેવી પ્રભાવશાળી વ્યક્તિની નારાજગી દૂર કરવામાં નિષ્ફળ જશે, તો આગામી વિધાનસભા ચૂંટણીમાં પાર્ટીને કેરળના ગઢમાં મોટું નુકસાન સહન કરવું પડી શકે છે.