નવી દિલ્હી :  ભારત સરકાર ૧ ફેબ્રુઆરી, ૨૦૨૬થી તમાકુ અને તેને લગતા ઉત્પાદનો માટે જીએસટી (GST) ગણતરીની પદ્ધતિમાં ક્રાંતિકારી ફેરફાર કરવા જઈ રહી છે. નવા નિયમ મુજબ, હવે પાન મસાલા, સિગારેટ, સિગાર અને નિકોટિન યુક્ત ઉત્પાદનો પર ટેક્સની ગણતરી કંપનીના વેચાણ ભાવને બદલે પેકેટ પર છાપેલ રિટેલ વેચાણ કિંમત (RSP) પર કરવામાં આવશે. આનો અર્થ એ થયો કે કંપનીઓ ભલે ગમે તેટલું ડિસ્કાઉન્ટ આપે, પરંતુ સરકારી તિજોરીમાં ટેક્સ તો છાપેલી મહત્તમ કિંમત મુજબ જ જમા કરાવવો પડશે. આ પગલાથી ટેક્સ ચોરી પર લગામ આવશે અને સરકારની આવકમાં મોટો વધારો થવાની ધારણા છે.

આ ફેરફારને કારણે ઉદ્યોગ જગતમાં ટેકનિકલ મૂંઝવણો ઉભી થઈ હતી, કારણ કે હાલની ઓનલાઈન સિસ્ટમ જૂના મોડલ પર ચાલે છે. ઘણીવાર RSP પર ગણાયેલ ટેક્સ વાસ્તવિક બિલ કરતા વધી જતો હોવાથી ઈ-વે બિલ અને ઈ-ઈન્વોઈસ જનરેટ કરવામાં મુશ્કેલી પડતી હતી. આ અડચણો દૂર કરવા માટે GSTN એ ખાસ એડવાઈઝરી જારી કરી છે. કંપનીઓને સૂચના અપાઈ છે કે તેઓ હાલ પૂરતું કરપાત્ર મૂલ્યમાં વાસ્તવિક વેચાણ કિંમત જ દર્શાવે, જેથી સિસ્ટમમાં 'એરર' ન આવે અને સપ્લાય ચેઈન ખોરવાય નહીં. આ એક પ્રકારની ટેકનિકલ રાહત છે જે વેપારીઓને નવા નિયમો સાથે અનુકૂલન સાધવા માટે 'બ્રીધિંગ સ્પેસ' પૂરી પાડશે.

આગામી સમયમાં તમાકુ ક્ષેત્રની કંપનીઓએ તેમના ERP સોફ્ટવેરથી લઈને રિટર્ન ફાઈલિંગ સુધીની તમામ પ્રક્રિયાઓ ઝડપથી અપડેટ કરવી પડશે. જોકે આનાથી કંપનીઓની કાર્યકારી મૂડી પર થોડો બોજ વધી શકે છે, પરંતુ લાંબા ગાળે ટેક્સ વિવાદો અને અર્થઘટનની સમસ્યાઓ ઘટશે. ૧ ફેબ્રુઆરીથી લાગુ થનારું આ નવું શાસન એ વાતનો સંકેત છે કે સરકાર ઉચ્ચ જોખમ ધરાવતા ક્ષેત્રોમાં આવક સુરક્ષિત કરવા માટે વધુ કડક અભિગમ અપનાવી રહી છે. તમાકુ ઉદ્યોગ માટે હવે ડિસ્કાઉન્ટના ખેલ પૂરા થયા છે અને પારદર્શક ટેક્સેશનનો યુગ શરૂ થયો છે.