કોલકાતા:પશ્ચિમ બંગાળમાં ૨૦૨૬ની વિધાનસભા ચૂંટણીના હજુ મહિનાઓ બાકી છે, પરંતુ રાજકીય પક્ષોએ અત્યારથી જ સોશિયલ મીડિયાને કુરુક્ષેત્ર બનાવી દીધું છે. મેટા (ફેસબુક-ઇન્સ્ટાગ્રામ) અને ગૂગલના તાજેતરના આંકડાઓ મુજબ, પશ્ચિમ બંગાળમાં રાજકીય પ્રચાર પાછળ માત્ર એક જ મહિનામાં રૂ. ૬.૩૮ કરોડ થી વધુનો ખર્ચ કરવામાં આવ્યો છે. આ ડિજિટલ જંગમાં મમતા બેનર્જીની તૃણમૂલ કોંગ્રેસ (TMC) એ ભારતીય જનતા પાર્ટી (BJP) ને ઘણી પાછળ છોડી દીધી છે.
મેટા પ્લેટફોર્મ્સ અને ગૂગલ એડ લાઇબ્રેરીના ડેટા મુજબ, ૧૮ ડિસેમ્બરથી ૧૬ જાન્યુઆરી સુધીના સમયગાળામાં ખર્ચના આંકડા નીચે મુજબ છે:
રાજકીય પક્ષ / સંગઠન મેટા પર ખર્ચ (રૂપિયામાં) ગૂગલ/યુટ્યુબ પર ખર્ચ (રૂપિયામાં)
તૃણમૂલ કોંગ્રેસ (TMC) ~૨.૪ કરોડ ~૩.૯ કરોડ (કુલ ખર્ચમાં હિસ્સો)
ભારતીય જનતા પાર્ટી (BJP) ~૧.૩૫ કરોડ (વધુ તપાસ હેઠળ)
 આ પ્રચારમાં માત્ર સત્તાવાર પેજીસ જ નહીં, પરંતુ પક્ષોના સમર્થનમાં ચાલતા 'સરોગેટ પેજીસ' (છૂપા પેજીસ) પણ મોટો રોલ ભજવી રહ્યા છે. ટીએમસીના સમર્થનમાં 'અબાર જીતબે બાંગ્લા', 'અમી બાંગ્લાર ડિજિટલ જોદ્ધા' જેવા પેજીસ દ્વારા લાખો રૂપિયા ખર્ચવામાં આવ્યા છે. આ પેજીસ દ્વારા માત્ર પોતાની સિદ્ધિઓ જ નહીં, પરંતુ વિરોધી પક્ષો પર નિશાન સાધતા વીડિયો પણ વાયરલ કરવામાં આવી રહ્યા છે.
 પશ્ચિમ બંગાળ વિધાનસભાની મુદત ૭ મે, ૨૦૨૬ના રોજ પૂર્ણ થઈ રહી છે. જોકે હજુ સુધી ચૂંટણી પંચે સત્તાવાર તારીખો જાહેર કરી નથી, પરંતુ સૂત્રોના જણાવ્યા મુજબ માર્ચ-એપ્રિલ ૨૦૨૬ દરમિયાન મતદાન યોજાય તેવી પ્રબળ શક્યતા છે. રાજ્યના મુખ્ય ચૂંટણી અધિકારી મનોજ કુમાર અગ્રવાલ મતદાર યાદી સુધારણા પ્રક્રિયાને ૧૪ ફેબ્રુઆરી સુધીમાં પૂર્ણ કરવા માટે કાર્યરત છે.