નવી દિલ્હી: ભારતના રસ્તાઓ પર થતા જીવલેણ અકસ્માતોને અટકાવવા માટે કેન્દ્રીય માર્ગ પરિવહન મંત્રી નીતિન ગડકરીએ એક અત્યંત આધુનિક અને હાઈટેક જાહેરાત કરી છે. હવે તમારા વાહનો રસ્તા પર ચાલતી વખતે એકબીજા સાથે ‘વાત’ કરશે. સરકાર એવી ટેકનોલોજી પર કામ કરી રહી છે જેમાં વાહનો વાયરલેસ રીતે એકબીજા સાથે ડેટા શેર કરશે, જેથી કોઈ પણ અકસ્માત થતા પહેલા જ ડ્રાઈવરને તેની જાણ થઈ જશે.
આ નવી સિસ્ટમ હેઠળ વાહનો એકબીજા સાથે હાઈ-સ્પીડ રેડિયો સિગ્નલ દ્વારા જોડાયેલા રહેશે. ધારો કે તમારી આગળ જઈ રહેલી કાર અચાનક બ્રેક મારે છે અથવા તેનું ટાયર ફાટે છે, તો તમારી કારના ડેશબોર્ડ પર મિલિસેકન્ડ્સમાં એલર્ટ આવી જશે. આ ટેકનોલોજી ખાસ કરીને હાઈવે પર થતા ‘ચેઈન બ્લાસ્ટ’ જેવા સામૂહિક અકસ્માતોને રોકવામાં ગેમ-ચેન્જર સાબિત થશે.
સ્પીડ અને સુરક્ષાનો સમન્વય: સરકારે આ હેતુ માટે 30 GHz રેડિયો ફ્રીક્વન્સી બેન્ડ ફાળવવાની મંજૂરી આપી દીધી છે. આ ફ્રીક્વન્સીની ખાસિયત એ છે કે તે અત્યંત ઝડપી છે અને તેમાં માહિતીની આપ-લેમાં જરા પણ વિલંબ (લેટન્સી) થતો નથી. આ સિસ્ટમ મોબાઈલ ઇન્ટરનેટ વગર સીધા રેડિયો સિગ્નલ પર કામ કરશે, એટલે કે નેટવર્ક ન હોય તેવા પહાડી વિસ્તારોમાં પણ તે કાર્યરત રહેશે.
 માત્ર વાહન જ નહીં, પણ રસ્તા પરના ટ્રાફિક સિગ્નલ અને કેમેરા પણ વાહન સાથે વાત કરશે (V2I - Vehicle to Infrastructure). આ સ્માર્ટ ટ્રાફિક મેનેજમેન્ટથી ટ્રાફિક જામની સમસ્યા ઘટશે અને બળતણની પણ બચત થશે. સરકારનું અંતિમ લક્ષ્ય માર્ગ અકસ્માતમાં થતા મૃત્યુના આંકડાને શૂન્ય પર લાવવાનું છે.
આ ટેકનોલોજી આગામી સમયમાં નવા લોન્ચ થનારા વાહનોમાં ઇન-બિલ્ટ જોવા મળી શકે છે, જ્યારે જૂના વાહનો માટે અલગથી ડિવાઇસ લગાવવાની સુવિધા અંગે પણ વિચારણા ચાલી રહી છે.