સિંગાપોર: ભારતીય વાયુસેના (IAF) ની વિશ્વ વિખ્યાત હેલિકોપ્ટર ડિસ્પ્લે ટીમ 'સારંગ' આવતા મહિને સિંગાપોર એરશો ૨૦૨૬માં પોતાની એરોબેટિક ક્ષમતાનું પ્રદર્શન કરવા માટે સજ્જ થઈ ગઈ છે. સિંગાપોરના પૂર્વ કિનારા પર આવેલા ચાંગી એક્ઝિબિશન સેન્ટર ખાતે યોજાનારા આ ભવ્ય કાર્યક્રમમાં ભારતીય પાયલોટ્સ હવામાં જોખમી અને આકર્ષક સ્ટંટ કરીને ભારતની એરોસ્પેસ શક્તિનો પરિચય કરાવશે.
સારંગ ટીમે સોશિયલ મીડિયા પ્લેટફોર્મ 'X' પર ઉત્સાહ વ્યક્ત કરતા લખ્યું કે, "સિંગાપોર, અમે આવી ગયા છીએ!" આ એરશોમાં ભારતની સાથે ઈન્ડોનેશિયાની 'જ્યુપિટર' અને ચીનની 'બાઈ' જેવી દિગ્ગજ એરોબેટિક ટીમો પણ ભાગ લઈ રહી છે. દ્વિવાર્ષિક ધોરણે યોજાતા આ એરશોમાં આ વખતે આધુનિક ફાઈટર જેટ્સ અને હેલિકોપ્ટર્સનું અદભૂત મિશ્રણ જોવા મળશે.
આ વર્ષે એરશોમાં પહેલીવાર રોયલ ઓસ્ટ્રેલિયન એરફોર્સનું પાંચમી પેઢીનું અદ્યતન ફાઈટર વિમાન F-35A લાઈટનિંગ-II આકર્ષણનું કેન્દ્ર બનશે. આ ઉપરાંત મલેશિયાનું સુખોઈ Su-30MKM અને સિંગાપોરનું F-16C ફાઈટર જેટ પણ પોતાની તાકાત બતાવશે. ભારતીય સારંગ ટીમ સ્વદેશી બનાવટના 'ધ્રુવ' હેલિકોપ્ટર્સનો ઉપયોગ કરીને હવામાં જે 'ફોર્મેશન' બનાવે છે, તે જોવું પ્રેક્ષકો માટે એક લ્હાવો હશે.
૩ થી ૯ ફેબ્રુઆરી દરમિયાન યોજાનારા આ શોમાં કુલ આઠ હવાઈ પ્રદર્શનો રજૂ કરવામાં આવશે. એક્સપિરીયા ઈવેન્ટ્સના જણાવ્યા મુજબ, આ એરશો માત્ર મનોરંજન માટે નથી, પરંતુ વિવિધ દેશો વચ્ચેના સંરક્ષણ સંબંધો અને ટેકનોલોજીના આદાન-પ્રદાન માટેનું મોટું પ્લેટફોર્મ છે. ભારતીય વાયુસેનાની હાજરીથી દક્ષિણ-પૂર્વ એશિયામાં ભારતની વ્યૂહાત્મક પકડ વધુ મજબૂત દેખાશે.