જ્‍યોર્જિયા,તા.૨૪: અમેરિકાના જ્‍યોર્જિયા રાજ્‍યમાં ઘરેલુ ઝઘડામાં એક ભારતીય મહિલા અને તેના ત્રણ સંબંધીઓની ગોળી મારીને હત્‍યા કરવામાં આવી હતી. હિસાથી બચવા માટે ત્રણ બાળકો કબાટમાં છુપાઈ ગયા હતા. હુમલાખોર બીજું કોઈ નહીં પણ મહિલાનો પતિ હતો, એમ અધિકારીઓએ જણાવ્‍યું હતું. વહેલી સવારે એટલાન્‍ટા નજીક લોરેન્‍સવિલેના એક ઘરમાં આ ઘટના બની હતી. એટલાન્‍ટામાં ભારતીય કોન્‍સ્‍યુલેટે પુષ્ટિ આપી હતી કે પીડિતોમાં એક ભારતીય નાગરિક પણ હતો અને કહ્યું હતું કે શંકાસ્‍પદ હુમલાખોરની ધરપકડ કરવામાં આવી છે. ભારતીય કોન્‍સ્‍યુલેટે શોક વ્‍યક્‍ત કર્યો હતો અને કહ્યું હતું કે તે શોકગ્રસ્‍ત પરિવારને શક્‍ય તમામ સહાય પૂરી પાડી રહ્યું છે.

એક્‍સ (અગાઉ ટ્‍વિટર) પર એક પોસ્‍ટમાં, મિશનએ જણાવ્‍યું હતું કે, અમે કથિત કૌટુંબિક વિવાદ સાથે જોડાયેલી આ દઃખદ ગોળીબારની ઘટનાથી ખૂબ જ દુઃખી છીએ, જેમાં એક ભારતીય નાગરિક પીડિતોમાં હતો. શંકાસ્‍પદ હુમલાખોરની ધરપકડ કરવામાં આવી છે અને શોકગ્રસ્‍ત પરિવારને તમામ શક્‍ય સહાય પૂરી પાડવામાં આવી રહી છે. સ્‍થાનિક મીડિયાએ શંકાસ્‍પદ વ્‍યક્‍તિની ઓળખ એટલાન્‍ટાના રહેવાસી ૫૧ વર્ષીય વિજય કુમાર તરીકે કરી છે. ગ્‍વિનેટ કાઉન્‍ટી પોલીસના જણાવ્‍યા અનુસાર, પીડિતોમાં વિજય કુમારની પત્‍ની, મીનુ ડોગરા (૪૩), ગૌરવ કુમાર (૩૩), નિધિ ચંદેર (૩૭) અને હરીશ ચંદેર (૩૮)નો સમાવેશ થાય છે.