ફ્રેઝરગંજ: ભારતીય દરિયાઈ સીમા પર સુરક્ષા એજન્સીઓએ બાંગ્લાદેશી કનેક્શન ધરાવતા દાણચોરીના એક મોટા નેટવર્કનો પર્દાફાશ કર્યો છે. ૨૨ જાન્યુઆરી, ૨૦૨૬ના રોજ ભારતીય કોસ્ટ ગાર્ડના ફ્રેઝરગંજ સ્ટેશને ગુપ્ત માહિતીના આધારે ઓપરેશન હાથ ધરીને સોપારીની હેરાફેરી કરતી ‘IFB લક્ષ્મીનારાયણ’ નામની ભારતીય માછીમારી બોટને ઝડપી પાડી છે.
 કોસ્ટ ગાર્ડની બોર્ડિંગ ટીમ જ્યારે ઘટનાસ્થળે પહોંચી ત્યારે દાણચોરો અધિકારીઓને જોઈને બોટ છોડીને ફરાર થઈ ગયા હતા. તલાશી લેતા બોટમાંથી ૫૨ થેલી સોપારી મળી આવી હતી. દરેક થેલીનું વજન ૫૦ કિલો હતું, એટલે કે કુલ ૨,૬૦૦ કિલો (૨.૬ ટન) સોપારીનો જથ્થો જપ્ત કરવામાં આવ્યો છે. આટલી મોટી માત્રામાં સોપારીની ગેરકાયદેસર આયાત પાછળ કોઈ મોટું આર્થિક કૌભાંડ હોવાની આશંકા છે.
જપ્ત કરવામાં આવેલી બોટ અને સોપારીના જથ્થાને બેનફિશ ફિશિંગ જેટી પર લાવવામાં આવ્યા છે. ત્યારબાદ આ સમગ્ર મામલો આગળની તપાસ માટે ફ્રેઝરગંજ કોસ્ટલ પોલીસ સ્ટેશનને સોંપવામાં આવ્યો છે. પોલીસ હવે એ તપાસ કરી રહી છે કે આ બોટનો માલિક કોણ છે અને બાંગ્લાદેશમાં કોના સંપર્કથી આ માલ ભારતમાં લાવવામાં આવતો હતો.
ભારતીય કોસ્ટ ગાર્ડે સ્પષ્ટ કર્યું છે કે તેઓ અન્ય સુરક્ષા એજન્સીઓ સાથે મળીને દરિયાકાંઠાના વિસ્તારોમાં ૨૪ કલાક નજર રાખી રહ્યા છે. ગેરકાયદેસર પ્રવૃત્તિઓ, ખાસ કરીને દાણચોરી અને ઘૂસણખોરી રોકવા માટે પેટ્રોલિંગ સઘન બનાવી દેવામાં આવ્યું છે. આ કાર્યવાહીથી દાણચોરોમાં ફફડાટ વ્યાપી ગયો છે.