નોઈડા: ઉત્તર પ્રદેશના શો-વિન્ડો ગણાતા નોઈડામાં વહીવટી તંત્રમાં મોટી સર્જરી કરવામાં આવી છે. એન્જિનિયર યુવરાજ મહેતાના રહસ્યમય અને કરુણ મૃત્યુ બાદ ફાટી નીકળેલા જનઆક્રોશને જોતા મુખ્યમંત્રી યોગી આદિત્યનાથે નોઈડા ઓથોરિટીના સીઈઓ ડૉ. લોકેશ એમ.ને તાત્કાલિક અસરથી પદ પરથી હટાવી દીધા છે. તેમના સ્થાને ૨૦૧૧ બેચના તેજતર્રાર IAS અધિકારી કૃષ્ણ કરુણેશને નોઈડાના નવા CEO તરીકે નિયુક્ત કરવામાં આવ્યા છે.
મૂળ બિહારના વતની કૃષ્ણ કરુણેશ અત્યાર સુધી મુખ્યમંત્રીના હોમ ગ્રાઉન્ડ ગોરખપુરના જિલ્લા મેજિસ્ટ્રેટ (DM) તરીકે સેવા આપી રહ્યા હતા. તેમની ગણના ઉત્તર પ્રદેશના સૌથી ગતિશીલ અને પરિણામલક્ષી અધિકારીઓમાં થાય છે. MA અને LLB ની ડિગ્રી ધરાવતા કરુણેશ અગાઉ ગાઝિયાબાદના સીડીઓ અને જીડીએ (GDA) ના ઉપાધ્યક્ષ તરીકે પણ સફળ કામગીરી કરી ચૂક્યા છે. તેમની પાસે હાપુડ અને બલરામપુર જેવા જિલ્લાઓ સંભાળવાનો બહોળો અનુભવ છે.
 એન્જિનિયર યુવરાજના મૃત્યુ બાદ નોઈડા ઓથોરિટીના વહીવટ સામે ગંભીર સવાલો ઉઠ્યા હતા. લોકોના ભારે વિરોધ પ્રદર્શન બાદ સરકાર એક્શન મોડમાં આવી હતી. ડૉ. લોકેશ એમ.ને હાલ વેટિંગ લિસ્ટમાં મૂકવામાં આવ્યા છે. વહીવટી નિષ્ણાતો માને છે કે કૃષ્ણ કરુણેશની નિમણૂક પાછળનો હેતુ નોઈડા ઓથોરિટીની છબી સુધારવાનો અને અટકેલા પ્રોજેક્ટ્સને ગતિ આપવાનો છે.
 નોઈડાના નવા સુકાની તરીકે કૃષ્ણ કરુણેશ સામે અનેક પડકારો છે. ભ્રષ્ટાચાર પર લગામ કસવી, બિલ્ડર-બાયર વિવાદો ઉકેલવા અને શહેરની સુરક્ષા વ્યવસ્થા મજબૂત કરવી તેમની પ્રાથમિકતા રહેશે. તાલીમ બાદ અયોધ્યાથી શરૂ થયેલી તેમની સફર હવે નોઈડા જેવા હાઈ-પ્રોફાઈલ શહેરના CEO પદ સુધી પહોંચી છે, જેના પર સમગ્ર રાજ્યની નજર રહેશે.