દુબઈ:  આગામી 2026 T20 વર્લ્ડ કપના પ્રારંભ પહેલા જ ક્રિકેટ જગતમાં એક મોટો ભૂકંપ આવ્યો છે. ઇન્ટરનેશનલ ક્રિકેટ કાઉન્સિલ (ICC) એ સત્તાવાર રીતે પુષ્ટિ કરી છે કે બાંગ્લાદેશ હવે આ ટૂર્નામેન્ટનો ભાગ નથી. ભારત અને શ્રીલંકા દ્વારા સંયુક્ત રીતે આયોજિત આ ટુર્નામેન્ટમાં બાંગ્લાદેશની ટીમને સ્કોટલેન્ડ દ્વારા રિપ્લેસ કરવામાં આવી છે. લાંબા સમયથી ચાલી રહેલા વિવાદનો અંત લાવતા ICCએ બાંગ્લાદેશને એક સ્પષ્ટ પત્ર લખીને આ જાણકારી આપી છે. હવે સ્કોટલેન્ડ ગ્રુપ-C માં ઈંગ્લેન્ડ, વેસ્ટ ઈન્ડિઝ, નેપાળ અને ઈટાલી જેવી મજબૂત ટીમો સામે ટકરાશે.

આ સમગ્ર વિવાદનું મૂળ ઈન્ડિયન પ્રીમિયર લીગ (IPL) ની હરાજીમાં રહેલું છે. કોલકાતા નાઈટ રાઈડર્સે (KKR) જ્યારે બાંગ્લાદેશી સ્ટાર બોલર મુસ્તફિઝુર રહેમાનને ₹9.2 કરોડમાં ખરીદ્યો, ત્યારે ભારતમાં સોશિયલ મીડિયા પર બાંગ્લાદેશમાં હિન્દુ લઘુમતીઓ પર થતા કથિત અત્યાચારોના વિરોધમાં ભારે હોબાળો થયો હતો. આ લોકજુવાળને ધ્યાને રાખી BCCI એ રહેમાનને IPL માંથી મુક્ત કરવા KKR ને સૂચના આપી. આ ઘટનાથી રોષે ભરાયેલા બાંગ્લાદેશ ક્રિકેટ બોર્ડ (BCB) એ સુરક્ષાનું બહાનું ધરીને ભારતમાં વર્લ્ડ કપ મેચો રમવાનો ઇનકાર કર્યો અને મેચો શ્રીલંકા ખસેડવાની માંગ કરી.

જોકે, ICC એ આ મામલે કડક વલણ અપનાવ્યું છે. ICC ના સુરક્ષા અહેવાલમાં ભારતમાં ખતરાનું સ્તર "નીચાથી મધ્યમ" હોવાનું જણાવાયું હતું, છતાં બાંગ્લાદેશ પોતાની જીદ પર અડગ રહ્યું. આખરે ICC બોર્ડમાં આ મુદ્દે થયેલા મતદાનમાં 14-2 થી બાંગ્લાદેશની વિરુદ્ધમાં નિર્ણય આવ્યો. પાકિસ્તાન સિવાય કોઈ પણ દેશે બાંગ્લાદેશને સાથ આપ્યો નહીં. ICC એ સ્પષ્ટ કર્યું કે જો બાંગ્લાદેશ નિર્ધારિત શિડ્યુલ મુજબ ભારતમાં નહીં રમે, તો તેમને ટૂર્નામેન્ટમાંથી બહાર કરી દેવામાં આવશે. અંતે, બાંગ્લાદેશના નરમ ન પડવાને કારણે સ્કોટલેન્ડને આ સુવર્ણ તક મળી છે.