કિવ: રશિયા અને યુક્રેન વચ્ચેના લોહિયાળ યુદ્ધને અટકાવવા માટે જ્યારે અબુ ધાબીમાં ટ્રમ્પની મધ્યસ્થી હેઠળ શાંતિ મંત્રણાની તૈયારીઓ ચાલી રહી હતી, ત્યારે જ વ્લાદિમીર પુતિને ફરી એકવાર પોતાની ક્રૂરતાનો પરચો આપ્યો છે. મંત્રણા શરૂ થાય તે પહેલાં જ રશિયાએ યુક્રેનના બે મોટા શહેરો, કિવ અને ખાર્કિવ પર ભયાનક મિસાઈલ હુમલો કરી દીધો છે. આ હુમલાથી ગુસ્સે ભરાયેલા યુક્રેનિયન વિદેશ મંત્રી એન્ડ્રી ત્સિબિહાએ આકરા પ્રહાર કરતા કહ્યું કે, પુતિન જેવા વ્યક્તિ વાટાઘાટોના ટેબલ પર બેસવાને લાયક નથી, તેમને તો ન્યાયના કઠેડામાં ઉભા રાખવા જોઈએ. આ ઘટનાએ વૈશ્વિક સ્તરે પ્રશ્ન ઉભો કર્યો છે કે શું પુતિન ખરેખર શાંતિ ઈચ્છે છે કે પછી આ માત્ર દુનિયાને ગેરમાર્ગે દોરવાનું કોઈ કાવતરું છે.

શનિવારે વહેલી સવારે રશિયાએ 375 ડ્રોન અને 21 અત્યાધુનિક મિસાઈલોનો ઉપયોગ કરીને યુક્રેનના ઉર્જા સ્ત્રોતોને નિશાન બનાવ્યા હતા, જેના કારણે રાજધાની કિવનો મોટો ભાગ અંધકારમાં ડૂબી ગયો હતો. પ્રારંભિક અહેવાલો મુજબ, આ હુમલામાં એક વ્યક્તિનું મોત થયું છે અને 23થી વધુ લોકો ગંભીર રીતે ઘાયલ થયા છે. યુક્રેનિયન વાયુસેનાના મતે, રશિયા જાણી જોઈને મંત્રણા પહેલા યુક્રેનની કમર તોડવા માંગે છે જેથી વાટાઘાટો દરમિયાન તેઓ યુક્રેન પર દબાણ બનાવી શકે. રશિયાનો આ આતંકવાદી અભિગમ સાબિત કરે છે કે તેઓ રાજકીય ઉકેલ કરતા લશ્કરી વર્ચસ્વમાં વધુ રસ ધરાવે છે.

બીજી તરફ, રાષ્ટ્રપતિ ઝેલેન્સકીએ અમેરિકાને અપીલ કરી છે કે પુતિન સાથે વેનેઝુએલાના સરમુખત્યાર માદુરો જેવો જ સખત વ્યવહાર કરવો જોઈએ. તેમણે સ્પષ્ટ કર્યું કે રશિયાની સુરક્ષાની ગેરંટી અને ન્યાય વિના કોઈ પણ કરાર સ્વીકારવામાં આવશે નહીં. જોકે, રશિયાના પ્રવક્તા દિમિત્રી પેસ્કોવે સાફ કરી દીધું છે કે તેઓ ડોનબાસ જેવા મહત્વના પ્રદેશો પર પોતાનો હક જતો કરશે નહીં. હવે સમગ્ર વિશ્વની નજર અબુ ધાબી પર ટકેલી છે, જ્યાં ડોનાલ્ડ ટ્રમ્પની હાજરીમાં આ બે વિરોધી દેશો આમને-સામને બેસવાના છે. શું આ મંત્રણા યુદ્ધનો અંત લાવશે કે પછી રશિયાના આ નવા હુમલા શાંતિના પ્રયાસોને કાયમ માટે દફનાવી દેશે, તે જોવું રહ્યું.