તેહરાન:  વિશ્વ અત્યારે શ્વાસ રોકીને મધ્ય પૂર્વ તરફ જોઈ રહ્યું છે, કારણ કે ઈરાન પર ગમે તે ક્ષણે ભયાનક લશ્કરી હુમલો થવાની સંભાવનાએ જોર પકડ્યું છે. અમેરિકા અને ઈઝરાયેલના વધતા દબાણ વચ્ચે તેહરાન પર હુમલાના વાદળો ઘેરાયા છે. અમેરિકી નૌકાદળનું શક્તિશાળી એરક્રાફ્ટ કેરિયર 'યુએસએસ અબ્રાહમ લિંકન' તેના સ્ટ્રાઈક ગ્રુપ સાથે ઈરાન તરફ આગળ વધી રહ્યું છે, જ્યારે સેન્ટકોમને હાઈ એલર્ટ પર રાખવામાં આવ્યું છે. આંતરરાષ્ટ્રીય ગુપ્તચર અહેવાલો મુજબ, આગામી 24 થી 48 કલાક નિર્ણાયક સાબિત થઈ શકે છે. ઈરાને પણ વળતો પ્રહાર કરતા ચેતવણી આપી છે કે જો તેમના પર હુમલો થયો તો તે 'ઓલઆઉટ વોર' (સંપૂર્ણ યુદ્ધ) માનવામાં આવશે અને તેનો જવાબ 'મહત્તમ બળ' થી આપવામાં આવશે.

યુદ્ધની આ ભીતિની સીધી અસર આંતરરાષ્ટ્રીય હવાઈ પરિવહન પર પડી છે. ઈરાન અને ઈઝરાયેલના હવાઈ ક્ષેત્રને જોખમી જાહેર કરવામાં આવતા KLM, એર ફ્રાન્સ અને લુફ્થાન્સા જેવી મોટી એરલાઇન્સે તેલ અવીવ અને દુબઈ તરફની તેમની તમામ ફ્લાઇટ્સ તાત્કાલિક અસરથી રદ કરી દીધી છે. માત્ર યુદ્ધ જ નહીં, પણ ખરાબ હવામાનને કારણે અમેરિકામાં પણ 8,400 ફ્લાઇટ્સ રદ થતા વૈશ્વિક પરિવહન વ્યવસ્થા ખોરવાઈ ગઈ છે. સોશિયલ મીડિયા પર 'શૂન્ય કલાક' (Zero Hour) ની ચર્ચાએ જોર પકડ્યું છે, અને એવું માનવામાં આવે છે કે જેરેડ કુશનરની ઈઝરાયેલ મુલાકાત પૂર્ણ થતા જ હુમલાની કાર્યવાહી શરૂ થઈ શકે છે.

ઈરાન અત્યારે આંતરિક અને બાહ્ય એમ બંને મોરચે સંકટમાં છે. એક તરફ દેશમાં ઉગ્ર વિરોધ પ્રદર્શનો અને ઈન્ટરનેટ બ્લેકઆઉટ જેવી સ્થિતિ છે, તો બીજી તરફ યુએસ સધર્ન કમાન્ડની સક્રિયતાએ તેહરાનની ઊંઘ હરામ કરી દીધી છે. ઈરાની રિવોલ્યુશનરી ગાર્ડ્સે દાવો કર્યો છે કે તેમની આંગળીઓ 'ટ્રિગર' પર છે અને તેઓ કોઈપણ ઉશ્કેરણીનો આકરો જવાબ આપવા તૈયાર છે. તુર્કી જેવા પાડોશી દેશોએ પણ ચિંતા વ્યક્ત કરી છે કે ઈઝરાયેલ ઈરાન પર પ્રહાર કરવાની માત્ર તકની જ રાહ જોઈ રહ્યું છે. જો સ્થિતિ વધુ બગડશે તો તેની અસર કાચા તેલના ભાવ અને વૈશ્વિક અર્થતંત્ર પર પણ જોવા મળી શકે છે.