નવી દિલ્હી:સ્થાનિક બજારમાં ઘઉંના મજબૂત સ્ટોક અને આગામી સિઝનમાં રેકોર્ડ ઉત્પાદનની શક્યતાઓને જોતા કેન્દ્ર સરકારે ૫,૦૦,૦૦૦ (૫ લાખ) ટન ઘઉંના લોટ અને તેની બનાવટોની નિકાસ કરવાની મંજૂરી આપી દીધી છે. વાણિજ્ય મંત્રાલયના આ નિર્ણયથી ખાસ કરીને પડોશી દેશો અને ખાડી દેશોમાં ભારતીય લોટની માંગ પૂરી થશે, જેઓ ખાદ્ય સુરક્ષા માટે ભારત પર નિર્ભર છે.
 સરકારની આ યોજના હેઠળ જે લોટ મિલો પાસે માન્ય આયાતકાર-નિકાસકાર કોડ (IEC) અને FSSAI લાયસન્સ છે, તેઓ અરજી કરી શકશે. નિકાસ અધિકૃતતા માટે અરજીઓનો પ્રથમ રાઉન્ડ ૨૧ જાન્યુઆરીથી શરૂ થઈ ચૂક્યો છે અને ૩૧ જાન્યુઆરી સુધી ચાલશે. નિકાસ માટે મળેલી પરવાનગી ૬ મહિના સુધી માન્ય રહેશે. વેપારી નિકાસકારો પણ લોટ મિલો સાથે જોડાણ કરીને આ પ્રક્રિયામાં ભાગ લઈ શકશે.
 આ વર્ષે અનુકૂળ હવામાન અને વાવેતર વિસ્તારમાં વધારો થવાને કારણે ભારતમાં ઘઉંનું ઉત્પાદન ગયા વર્ષના ૧૧૭.૯૪ મિલિયન ટનના રેકોર્ડને પણ તોડે તેવો અંદાજ છે. જ્યારે પાક વિપુલ પ્રમાણમાં હોય ત્યારે ભાવમાં ભારે ઘટાડો ન થાય અને ખેડૂતોને યોગ્ય ભાવ મળી રહે તે હેતુથી સરકારે નિકાસની બારી ખોલી છે. આ પગલાથી વૈશ્વિક બજારમાં ભારત ફરી એકવાર મોટા ખેલાડી તરીકે ઉભરી આવશે.
 નિષ્ણાતો માને છે કે નિકાસ માટે મર્યાદિત ક્વોટા (૫ લાખ ટન) રાખવામાં આવ્યો હોવાથી સ્થાનિક બજારમાં લોટના ભાવ વધવાની શક્યતા ઓછી છે. તેના બદલે, નવા પાકની આવક પહેલા જૂના સ્ટોકનો નિકાલ થવાથી બજારમાં સ્થિરતા આવશે. જોકે, ગ્રાહકો માટે લોટ મોંઘો ન થાય તે માટે સરકાર નિકાસ પર સતત નજર રાખશે.