ઢાકા:બાંગ્લાદેશમાં લઘુમતી હિન્દુ સમુદાય પર થઈ રહેલા અત્યાચારો અટકવાનું નામ નથી લઈ રહ્યા. પાડોશી દેશના નરસિંગડી જિલ્લામાં ફરી એકવાર માનવતા શર્મસાર થઈ છે, જ્યાં માત્ર ૨૩ વર્ષના એક હિન્દુ યુવાનને જીવતો સળગાવી દેવાની ભયાનક ઘટના સામે આવી છે. ચંચલ ચંદ્ર ભૌમિક નામનો આ યુવાન શુક્રવારે રાત્રે પોતાના ઓટોમોબાઈલ વર્કશોપમાં કામ પતાવીને શાંતિથી સૂઈ રહ્યો હતો, ત્યારે જ અંધારાના ઓથારે આવેલા ઉગ્રવાદીઓએ ગેરેજના શટર નીચેથી જ્વલનશીલ પદાર્થ નાખીને આગ ચાંપી દીધી હતી. જોતજોતામાં આખું ગેરેજ આગની લપેટમાં આવી ગયું અને આ માસૂમ યુવાનને જીવ બચાવવાનો મોકો પણ મળ્યો નહીં.

પોલીસ તપાસમાં બહાર આવ્યું છે કે આ કોઈ આકસ્મિક દુર્ઘટના નથી પરંતુ એક સુનિયોજિત અને પૂર્વયોજિત હત્યા છે. ઘટનાસ્થળની આસપાસ લગાવવામાં આવેલા સીસીટીવી (CCTV) ફૂટેજમાં સ્પષ્ટ દેખાય છે કે શંકાસ્પદ હુમલાખોરો ગેરેજ પાસે આવે છે અને શટરની અંદર આગ લગાવીને ભાગી છૂટે છે. ગેરેજમાં પેટ્રોલ અને ઓઈલ જેવા જ્વલનશીલ પદાર્થો હોવાથી આગે વિકરાળ સ્વરૂપ ધારણ કર્યું હતું. ચંચલના પિતા ખોકન ચંદ્ર ભૌમિક, જેઓ પોતે પણ ત્યાં મિકેનિક તરીકે કામ કરે છે, તેમના માટે આ આઘાત સહન કરવો અશક્ય બની ગયો છે. એક મહેનતુ યુવાનનું આ રીતે મોત થતા સ્થાનિક હિન્દુ સમુદાયમાં ભારે આક્રોશ જોવા મળી રહ્યો છે.

બાંગ્લાદેશમાં છેલ્લા કેટલાક અઠવાડિયાથી હિન્દુઓ પર ટાર્ગેટેડ હુમલાઓ વધી રહ્યા છે. મૈમનસિંહમાં હિન્દુ વ્યક્તિની હત્યા અને દીપુ ચંદ્ર દાસ પર થયેલા હુમલા બાદ નરસિંગડીની આ ઘટનાએ લઘુમતીઓમાં ભયનું વાતાવરણ ઉભું કર્યું છે. ઘણા પરિવારો હવે પોતાના ઘરો અને વ્યવસાયના સ્થળોએ સુરક્ષિત અનુભવી રહ્યા નથી. નરસીંગડી સદર મોડેલ પોલીસ સ્ટેશનના ઇન્સ્પેક્ટર એઆરએમ અલ મામુને ખાતરી આપી છે કે સીસીટીવી ફૂટેજના આધારે આરોપીઓને પકડવા માટે અલગ-અલગ ટીમો બનાવવામાં આવી છે, પરંતુ સ્થાનિક લોકોનો આક્ષેપ છે કે આવા કિસ્સાઓમાં કડક કાર્યવાહીના અભાવે ગુનેગારોના હોસલા વધી રહ્યા છે.

આંતરરાષ્ટ્રીય સ્તરે પણ બાંગ્લાદેશમાં હિન્દુઓની સુરક્ષાને લઈને ચિંતાઓ વ્યક્ત કરવામાં આવી રહી છે. ધાર્મિક કટ્ટરતાનો ભોગ બની રહેલા લઘુમતીઓની સુરક્ષા માટે સરકાર દ્વારા કોઈ નક્કર પગલાં લેવામાં ન આવતા ભારત સહિત વિશ્વના અનેક દેશોમાં આ ઘટનાના ઘેરા પ્રત્યાઘાતો પડ્યા છે. ૨૩ વર્ષના ચંચલની બળી ગયેલી લાશ માત્ર એક વ્યક્તિનો અંત નથી, પરંતુ તે બાંગ્લાદેશમાં કથળતી જતી કાયદો અને વ્યવસ્થાની સ્થિતિનો જીવતો જાગતો પુરાવો છે. હવે જોવાનું એ રહે છે કે આંતરરાષ્ટ્રીય દબાણ વચ્ચે બાંગ્લાદેશ પ્રશાસન આ નૃશંસ હત્યાના આરોપીઓને સજા અપાવવામાં કેટલી સફળતા મેળવે છે.