નવી મુંબઈ: નવી મુંબઈના ઔદ્યોગિક હબ ગણાતા પવને MIDC વિસ્તારમાં શનિવારે બપોરે કાળઝાળ આગ લાગવાની ઘટનાથી હડકંપ મચી ગયો હતો. બપોરે ૧૨:૩૦ વાગ્યાના અરસામાં અચાનક ફાટી નીકળેલી આ આગે જોતજોતામાં રૌદ્ર સ્વરૂપ ધારણ કરી લીધું હતું અને આસપાસના ચાર મોટા ઔદ્યોગિક એકમોને પોતાની લપેટમાં લઈ લીધા હતા. આ આગ એટલી ભીષણ હતી કે તેના કારણે નીકળેલા કાળા ધુમાડાના ગોટેગોટા કિલોમીટરો દૂરથી જોઈ શકાતા હતા, જેના કારણે સમગ્ર MIDC પટ્ટામાં ભયનું વાતાવરણ ફેલાઈ ગયું હતું.
મળતી વિગતો મુજબ, આગ સૌથી પહેલા એક યુનિટમાં લાગ્યા બાદ ઝડપથી બીટા કેમિકલ, રાયગઢ કેમિકલ અને નેશનલ રબરના બે યુનિટમાં પ્રસરી ગઈ હતી. આ એકમોમાં કેમિકલ અને રબર જેવો જ્વલનશીલ પદાર્થનો જથ્થો હોવાથી આગે વિકરાળ સ્વરૂપ લીધું હતું અને વચ્ચે-વચ્ચે મોટા ધડાકાઓ પણ સંભળાયા હતા. આગ લાગતાની સાથે જ નજીકની ફેક્ટરીઓમાં કામ કરતા સેંકડો કામદારો જીવ બચાવવા માટે સાવચેતીના ભાગરૂપે બહાર દોડી આવ્યા હતા. પોલીસ અને નાગરિક અધિકારીઓએ તાત્કાલિક વિસ્તારને ખાલી કરાવી કોર્ડન કરી લીધો હતો.
ઘટનાની ગંભીરતા જોતા નવી મુંબઈ ફાયર બ્રિગેડ દ્વારા હાઈ-એલર્ટ જાહેર કરવામાં આવ્યું હતું. કોપરખૈરણે, શિર્વણે અને સિડકો ફાયર સ્ટેશનથી ૧૨થી વધુ ફાયર ટેન્ડરો ઘટનાસ્થળે ધસી ગયા હતા. વાશી ડિવિઝનના એસીપી આદિનાથ બુધવંત અને તેમની ટીમે ફાયર ફાઈટરો સાથે સતત સંકલન સાધી આગને વધુ ફેલાતી અટકાવી હતી. લગભગ ૩ કલાક સુધી સતત પાણી અને ફોમનો મારો ચલાવ્યા બાદ આગ પર કાબૂ મેળવી શકાયો હતો. સદનસીબે, આ મોટી હોનારતમાં કોઈ જાનહાનિ કે ઈજાના અહેવાલ નથી, જે એક મોટી રાહતની વાત છે.
આગ ઓલવાયા બાદ પણ કેમિકલના કારણે ફરીથી જ્વાળાઓ ન ભભૂકે તે માટે મોડી સાંજ સુધી કૂલિંગ ઓપરેશન ચાલુ રાખવામાં આવ્યું હતું. પ્રાથમિક અંદાજ મુજબ આ આગમાં કરોડો રૂપિયાનું મશીનરી અને કાચા માલનું નુકસાન થયું છે. જોકે, આગ લાગવાનું ચોક્કસ કારણ હજુ સુધી જાણી શકાયું નથી; તે શોર્ટ સર્કિટ હતી કે કેમિકલ રિએક્શન તે દિશામાં તપાસ શરૂ કરવામાં આવી છે. અધિકારીઓએ જણાવ્યું છે કે પંચનામું અને નુકસાનનું મૂલ્યાંકન સ્થિતિ સંપૂર્ણ સ્થિર થયા બાદ કરવામાં આવશે.