અયોધ્યા: ઉત્તર પ્રદેશની ધર્મનગરી અયોધ્યામાં શનિવારે રાત્રે તે સમયે સનસનાટી મચી ગઈ જ્યારે ભવ્ય રામ મંદિરને બોમ્બ વિસ્ફોટથી ઉડાવી દેવાની ધમકી આપવામાં આવી. રાત્રે અંદાજે ૧૦:૩૦ વાગ્યે પોલીસ હેલ્પલાઈન નંબર '૧૧૨' પર એક અજાણ્યા શખ્સનો ફોન આવ્યો, જેમાં દાવો કરવામાં આવ્યો કે મંદિરમાં ગમે ત્યારે વિસ્ફોટ થશે. આ સમાચાર મળતા જ અયોધ્યા પોલીસ સહિત ગુપ્તચર એજન્સીઓ અને એન્ટી ટેરરિસ્ટ સ્ક્વોડ (ATS) એલર્ટ મોડ પર આવી ગઈ હતી. રામ મંદિર પરિસર અને તેની આસપાસના વિસ્તારોમાં રાતોરાત સર્ચ ઓપરેશન શરૂ કરવામાં આવ્યું હતું.

સુરક્ષા એજન્સીઓએ ટેકનિકલ સર્વેલન્સની મદદથી તાત્કાલિક કાર્યવાહી કરી અને ફોન કરનાર વ્યક્તિનું લોકેશન ટ્રેસ કર્યું હતું. પોલીસે ગણતરીના કલાકોમાં જ પાડોશી જિલ્લા ગોંડામાંથી એક યુવકની અટકાયત કરી લીધી છે. પ્રાથમિક તપાસમાં બહાર આવ્યું છે કે આ યુવક ગોંડાનો રહેવાસી છે. તેની ધરપકડ બાદ પોલીસ અને ઈન્ટેલિજન્સ બ્યુરો (IB) ના અધિકારીઓ તેની કડક પૂછપરછ કરી રહ્યા છે. સમગ્ર રામનગરીમાં સુરક્ષા વ્યવસ્થા લોખંડી કરી દેવામાં આવી છે અને દરેક શંકાસ્પદ ગતિવિધિ પર નજર રાખવામાં આવી રહી છે.

પોલીસ સૂત્રોના જણાવ્યા મુજબ, પકડાયેલો યુવક માનસિક રીતે અસ્થિર હોવાનું જણાઈ રહ્યું છે, પરંતુ પોલીસ કોઈ પણ પ્રકારનું જોખમ લેવા માંગતી નથી. અધિકારીઓ તપાસ કરી રહ્યા છે કે શું આ યુવક ખરેખર બીમાર છે કે પછી કોઈ મોટા ષડયંત્રના ભાગરૂપે તેણે આ રીતે સુરક્ષા એજન્સીઓને ભ્રમિત કરવાનો પ્રયાસ કર્યો છે. યુવકની કુંડળી ખંગાળવામાં આવી રહી છે અને તેના કોઈ શંકાસ્પદ જૂથ સાથે સંપર્ક છે કે કેમ તેની પણ ઝીણવટભરી તપાસ ચાલી રહી છે. હાલમાં પોલીસે તેનું નામ અને સરનામું ગુપ્ત રાખ્યું છે.

આ ધમકી બાદ રામજન્મભૂમિના પ્રવેશદ્વારો અને હનુમાનગઢી સહિતના મહત્વના સ્થળો પર તપાસ તેજ કરી દેવામાં આવી છે. શ્રદ્ધાળુઓને કોઈ તકલીફ ન પડે તે રીતે શાંતિપૂર્ણ રીતે ચેકિંગ હાથ ધરવામાં આવી રહ્યું છે. પોલીસ પ્રશાસને લોકોને અપીલ કરી છે કે તેઓ કોઈ પણ પ્રકારની અફવાઓ પર વિશ્વાસ ન કરે અને જો કંઈપણ શંકાસ્પદ જણાય તો તાત્કાલિક જાણ કરે. અયોધ્યામાં હાલ હાઈ-એલર્ટ જેવી સ્થિતિ છે અને સુરક્ષા દળો ૨૪ કલાક પેટ્રોલિંગ કરી રહ્યા છે.