મધ્ય પૂર્વની ભૌગોલિક રાજકીય સ્થિતિની સીધી અસર હવે આંતરરાષ્ટ્રીય નાગરિક ઉડ્ડયન ક્ષેત્ર પર જોવા મળી રહી છે. ઈઝરાયેલ અને ઈરાન બંને દેશો દ્વારા જારી કરવામાં આવેલા નવા આદેશોને પગલે હવાઈ મુસાફરી પર અનિશ્ચિતતાના વાદળો ઘેરાયા છે. 

ઈઝરાયેલ સિવિલ એવિએશન ઓથોરિટીના ડાયરેક્ટર જનરલ શમુએલ ઝકાઈએ રવિવારે વિવિધ આંતરરાષ્ટ્રીય એરલાઈન્સને પત્ર લખીને ગંભીર ચેતવણી આપી છે. પત્રમાં જણાવવામાં આવ્યું છે કે આ સપ્તાહનો અંત એક "વધુ સંવેદનશીલ સમયગાળા"ની શરૂઆત છે.

ઈઝરાયેલી અધિકારીએ સ્પષ્ટ કર્યું છે કે તેમની વાયુ રક્ષા પ્રણાલીઓ (એર-ડિફેન્સ સિસ્ટમ્સ) સંપૂર્ણ તૈનાત છે અને "હાઈ એલર્ટ" પર છે. એરલાઈન્સને ચેતવવામાં આવી છે કે ગમે તે ક્ષણે ઈઝરાયેલનું આકાશ સંપૂર્ણપણે બંધ કરવામાં આવી શકે છે, જેવું અગાઉ ઈરાન સાથેના "બાર-દિવસીય યુદ્ધ" દરમિયાન કરવામાં આવ્યું હતું. આ ચેતવણી દર્શાવે છે કે ઈઝરાયેલ કોઈપણ સંભવિત હવાઈ હુમલાનો સામનો કરવા માટે સજ્જ છે અને મુસાફરોની સુરક્ષાને ધ્યાનમાં રાખીને તાત્કાલિક નિર્ણયો લઈ શકે છે.

બીજી તરફ, ઈરાનના નાગરિક ઉડ્ડયન સત્તામંડળે પણ નોટિસ-ટુ-એરમેન (નોટામ)ને લંબાવી છે. આ નોટિસ હેઠળ તમામ વિઝ્યુઅલ ફ્લાઇટ રૂલ્સ (વીએફઆર) ફ્લાઇટ્સ અને જનરલ એવિએશન પર પ્રતિબંધ મૂકવામાં આવ્યો છે. જોકે, મેડિકલ, સર્ચ-એન્ડ-રેસ્ક્યુ, સરકારી, લશ્કરી અને નેશનલ ઈરાનિયન ઓઈલ કંપનીની ફ્લાઈટ્સને આમાંથી મુક્તિ આપવામાં આવી છે. આ પ્રતિબંધ અગાઉ ૩૦ જાન્યુઆરી, ૨૦૨૬ના રોજ પૂરો થવાનો હતો, જેને હવે ૨૫ એપ્રિલ, ૨૦૨૬ સુધી લંબાવવામાં આવ્યો છે. 

જોકે, નિષ્ણાતો સ્પષ્ટતા કરે છે કે ઈરાનનો આ નિર્ણય નવેમ્બર ૨૦૨૫થી ચાલુ પ્રક્રિયાનો ભાગ છે અને તે કોઈ તાત્કાલિક યુદ્ધનો સંકેત નથી, પરંતુ ઈઝરાયેલની ચેતવણી અને ઈરાનના લંબાયેલા પ્રતિબંધોએ સંયુક્ત રીતે પ્રદેશમાં ભયનો માહોલ ઊભો કર્યો છે.