રાજકોટ: વૈશ્વિક અર્થતંત્રમાં સર્જાયેલી ભારે ઉથલપાથલ અને ભૌગોલિક તણાવની સ્થિતિ વચ્ચે કિંમતી ધાતુઓના બજારમાં આજે ધરતીકંપ જેવો માહોલ જોવા મળ્યો છે. 26 જાન્યુઆરી 2026ના રોજ આંતરરાષ્ટ્રીય બજારમાં સોનાએ એક એવી છલાંગ લગાવી છે જેની કલ્પના કદાચ કોઈ નિષ્ણાતે પણ નહીં કરી હોય. ઇતિહાસમાં પ્રથમવાર સોનું પ્રતિ ઔંસ $5,000ના મનોવૈજ્ઞાનિક સ્તરને પાર કરી ગયું છે. સુરક્ષિત રોકાણના સાધન તરીકે વિશ્વભરના રોકાણકારો સોના તરફ વળતા ભાવમાં આ અકલ્પનીય ઉછાળો જોવા મળ્યો છે.

આજના ટ્રેડિંગ સેશનમાં સોનાના ભાવમાં 1.62%નો જોરદાર વધારો નોંધાયો છે, જેના કારણે કિંમત પ્રતિ ઔંસ 5,080 ડૉલરની સપાટીએ પહોંચી ગઈ છે. બીજી તરફ, ચાંદીના બજારમાં તો જાણે સુનામી આવી હોય તેમ એક જ દિવસમાં 4.51%નો તોતિંગ ઉછાળો જોવા મળ્યો છે. આંતરરાષ્ટ્રીય બજારમાં ચાંદી $109ની સપાટીને આંબી ગઈ છે. આ આંકડાઓ સ્પષ્ટ સંકેત આપી રહ્યા છે કે આગામી દિવસોમાં ઘરેણાં ખરીદવા સામાન્ય માણસના ગજા બહારની વાત બની શકે છે.

જ્યારે આંતરરાષ્ટ્રીય સ્તરે કિંમતી ધાતુઓ ઉછળી રહી છે, ત્યારે ભારતીય ચલણ રૂપિયામાં પણ નરમાશ જોવા મળી છે. ડૉલર સામે રૂપિયો ઘસાઈને 91.65ની સપાટીએ પહોંચી ગયો છે. ચલણના અવમૂલ્યન અને આંતરરાષ્ટ્રીય તેજીના ડબલ ડોઝને કારણે આવતીકાલે જ્યારે ભારતીય બજાર ખુલશે, ત્યારે સોના અને ચાંદીના સ્થાનિક ભાવમાં મોટો ભડકો થવાની શક્યતા છે. લગ્નસરાની મોસમ પૂર્વે આવેલી આ તેજીએ મધ્યમ વર્ગના લોકોની ચિંતામાં અનેકગણો વધારો કરી દીધો છે.

રેકોર્ડબ્રેક તેજી વચ્ચે બજારના નિષ્ણાતો માની રહ્યા છે કે જ્યાં સુધી વૈશ્વિક સ્તરે રાજકીય સ્થિરતા નહીં આવે, ત્યાં સુધી સોનામાં ઘટાડાની શક્યતા નહિવત છે. રોકાણકારો હવે શેરબજારને બદલે સોનાને વધુ સુરક્ષિત માની રહ્યા છે. આ પરિસ્થિતિમાં સામાન્ય ગ્રાહકો માટે સોનું ખરીદવું એ હવે 'લોઢાના ચણા ચાવવા' જેવું સાબિત થશે. આવતીકાલે સવારે જ્યારે ઈન્ડિયા બુલિયન એન્ડ જ્વેલર્સ એસોસિએશન દ્વારા નવા ભાવો જાહેર થશે, ત્યારે ઝવેરી બજારમાં ભારે અફરાતફરી જોવા મળી શકે છે.