નવી દિલ્હી: ભારત આજે તેના 77મા પ્રજાસત્તાક પર્વની ઉજવણીના રંગે રંગાયું છે, ત્યારે દેશની રાજધાની દિલ્હીમાં દેશભક્તિનો અનોખો જુસ્સો જોવા મળી રહ્યો છે. વડાપ્રધાન નરેન્દ્ર મોદીએ સવારે નેશનલ વોર મેમોરિયલ (રાષ્ટ્રીય સમર સ્મારક) ખાતે પહોંચીને દેશની રક્ષા કાજે સર્વોચ્ચ બલિદાન આપનારા અમર શહીદોને શ્રદ્ધાંજલિ અર્પણ કરી હતી. આ ભાવુક ક્ષણે રક્ષા મંત્રી રાજનાથ સિંહ અને ત્રણેય સેનાના વડાઓ પણ હાજર રહ્યા હતા. શહીદોને નમન કર્યા બાદ પીએમ મોદીએ સ્મારકની ડિજિટલ વિઝિટર બુકમાં પોતાના વિચારો વ્યક્ત કરી વિકસિત ભારતના સંકલ્પને દોહરાવ્યો હતો.

સમારોહની મુખ્ય શરૂઆત કર્તવ્ય પથ પર રાષ્ટ્રપતિ દ્રૌપદી મુર્મુ દ્વારા રાષ્ટ્રધ્વજ લહેરાવીને કરવામાં આવી હતી. આ વર્ષની ઉજવણી 'વંદે માતરમના 150 વર્ષ' ની ખાસ થીમ પર આધારિત છે, જે ભારતના સ્વાતંત્ર્ય સંગ્રામના અમર ગીતની ગરિમાને ઉજાગર કરે છે. આ વર્ષે યુરોપિયન યુનિયનના ટોચના નેતાઓ એન્ટોનિયો કોસ્ટા અને ઉર્સુલા વોન ડેર લેયેન મુખ્ય અતિથિ તરીકે ઉપસ્થિત રહીને ભારતની લોકતાંત્રિક તાકાતના સાક્ષી બન્યા છે. પરેડમાં સેનાના અત્યાધુનિક શસ્ત્રો અને ખાસ કરીને 'ઓપરેશન સિંદૂર' ની ઝલક જોઈને દુનિયા ભારતની વધતી સૈન્ય શક્તિથી અંજાઈ ગઈ છે.

કેન્દ્ર સરકાર દ્વારા આ વખતની ઉજવણીમાં 'સબકા સાથ, સબકા વિકાસ' ના મંત્રને સાર્થક કરતા એક પ્રશંસનીય પહેલ કરવામાં આવી છે. દેશભરના વિવિધ રાજ્યોમાંથી લઘુમતી સમુદાયો જેવા કે મુસ્લિમ, શિખ, ખ્રિસ્તી, બૌદ્ધ, જૈન અને પારસી પરિવારોને ખાસ મહેમાન તરીકે આમંત્રિત કરવામાં આવ્યા છે. લઘુમતી બાબતોના મંત્રી કિરન રિજિજુએ આ પરિવારો સાથે મુલાકાત કરી હતી, જેઓ પીએમ મોદીના વિશેષ આમંત્રણથી દિલ્હી આવ્યા છે. આ પરિવારોએ સરકારની વિવિધ યોજનાઓથી તેમના જીવનમાં આવેલા હકારાત્મક પરિવર્તનની ગાથાઓ પણ વહેંચી હતી, જે ભારતના સર્વસમાવેશક લોકતંત્રની સાચી ઓળખ આપે છે.

કર્તવ્ય પથ પર નીકળેલી વિવિધ રાજ્યોની રંગબેરંગી ઝાંખીઓએ ભારતની સાંસ્કૃતિક વિવિધતાને એકતાના તાંતણે બાંધી હતી. 26 જાન્યુઆરી 1950ના રોજ જ્યારે આપણું બંધારણ અમલમાં આવ્યું હતું, તે જ ગૌરવશાળી લોકતાંત્રિક મૂલ્યોને આજે આધુનિક ટેક્નોલોજી અને શિસ્તબદ્ધ માર્ચ પાસ્ટ દ્વારા રજૂ કરવામાં આવ્યા છે. આકાશમાં વાયુસેનાના વિમાનોના કરતબ અને જમીન પર સેનાની ટુકડીઓના પગરવથી આખું દિલ્હી ગુંજી ઉઠ્યું હતું. 77મો ગણતંત્ર દિવસ સાબિત કરે છે કે ભારત માત્ર સુરક્ષિત જ નથી, પરંતુ તે એક મજબૂત અને સમૃદ્ધ રાષ્ટ્ર તરીકે વિશ્વના નકશા પર ઉભરી રહ્યું છે.