નવી દિલ્હી: આ વર્ષે પ્રજાસત્તાક દિવસની પરેડમાં જ્યારે અત્યાધુનિક ટેન્કો અને મિસાઇલો પસાર થઈ રહી હતી, ત્યારે અચાનક પ્રેક્ષકોની નજર સેનાના એવા 'મૂંગા સૈનિકો' પર ઠરી જેમને અત્યાર સુધી પડદા પાછળના હીરો માનવામાં આવતા હતા. ભારતીય સેનાના રિમાઉન્ટ અને વેટરનરી કોર્પ્સ (RVC) એ પહેલીવાર "સાયલન્ટ વોરિયર્સ" નામની વિશેષ પ્રાણી ટુકડીને મેદાનમાં ઉતારી હતી. આ ટુકડીએ સાબિત કરી દીધું કે જ્યારે ટેકનોલોજી નિષ્ફળ જાય છે, ત્યારે કુદરતના આ યોદ્ધાઓ હિમાલયની બરફીલી ખીણોમાં ભારતની રક્ષા માટે ઢાલ બનીને ઉભા રહે છે.

પરેડનું સૌથી મોટું આકર્ષણ લદ્દાખની શાન ગણાતા બે કૂંધવાળા 'બેક્ટ્રિયન ઊંટ' હતા, જેમના નામ ગલવાન અને નુબ્રા ખીણ પરથી રાખવામાં આવ્યા છે. આ ઊંટ સામાન્ય ઊંટ કરતા અલગ છે, જે શૂન્યથી નીચે ૪૦ ડિગ્રી તાપમાનમાં પણ ૨૫૦ કિલો સુધીનું વજન વહન કરી શકે છે. લદ્દાખના એવા વિસ્તારો જ્યાં સેનાના  વાહનોના ટાયર બરફમાં ફસાઈ જાય છે, ત્યાં આ ઊંટ શસ્ત્રો અને રાશન પહોંચાડવા માટે લાઈફલાઈન સમાન સાબિત થાય છે. ખોરાક-પાણી વિના લાંબો સમય ટકી રહેવાની તેમની ક્ષમતા તેમને ઊંચાઈવાળા યુદ્ધક્ષેત્રના અસલી 'કિંગ' બનાવે છે.

આકાશમાં દુશ્મનના ડ્રોનનો ખતરો વધ્યો છે ત્યારે ભારતીય સેનાએ તેનો તોડ 'બ્લેક કાઈટ' એટલે કે કાળા પતંગો (સમડી) દ્વારા શોધ્યો છે. પરેડમાં "ઇન્જેનિયસ અને વિજિલન્ટ બર્ડ્સ" તરીકે ઓળખાતા ચાર પ્રશિક્ષિત પક્ષીઓએ સૌના દિલ જીતી લીધા હતા. આ પક્ષીઓને ખાસ ડ્રોન વિરોધી ઓપરેશન માટે તાલીમ આપવામાં આવી છે. તેમની નજર એટલી તીક્ષ્ણ છે કે તે હવામાં ઉડતા શંકાસ્પદ ડ્રોનને તુરંત શોધી કાઢે છે અને તેને તોડી પાડવા કે ગૂંચવી નાખવામાં સક્ષમ છે. આકાશમાં ગુંજતી તેમની પાંખો હવે ચીન અને પાકિસ્તાન સરહદે ભારતનું હવાઈ સંરક્ષણ મજબૂત કરશે.

આ ટુકડીમાં માત્ર પક્ષીઓ અને ઊંટ જ નહીં, પણ લદ્દાખના મુશ્કેલ રસ્તાઓના સાથી એવા 'ઝાંસ્કર પોની' અને ભારતીય ઓલાદના શક્તિશાળી કૂતરા 'મુધોલ' તથા 'રામપુર હાઉન્ડ' પણ સામેલ હતા. આ શ્વાનો વિસ્ફોટકો શોધવા અને દુશ્મનોને ટ્રેક કરવામાં માહેર છે. ૨૦૨૬ની આ પરેડ એ વાતની ગવાહી પૂરે છે કે ભારતીય સેનાએ હાઈ-ટેક વોરફેરની સાથે સાથે પ્રાકૃતિક કૌશલ્યનો પણ અદભૂત સમન્વય સાધ્યો છે. આ "સાયલન્ટ વોરિયર્સ" વગર હિમાલયની રક્ષા અધૂરી છે, અને આજે દેશવાસીઓએ તેમને ઉભા થઈને સલામી આપી હતી.