ચંદીગઢ: હરિયાણાના મુખ્યમંત્રી નાયબ સિંહ સૈનીએ રાષ્ટ્રીય પર્વના અવસરે દેશની રક્ષા કાજે બલિદાન આપનારા વીર સપૂતો અને તેમના પરિવારો માટે મોટી જાહેરાતોનો પિટારો ખોલ્યો છે. મુખ્યમંત્રીએ શહીદોના પરિવારોની આર્થિક સુરક્ષા સુનિશ્ચિત કરવા માટે વળતરની રકમમાં તોતિંગ વધારો કર્યો છે. હવે યુદ્ધમાં જીવ ગુમાવનારા સૈનિકોના આશ્રિતોને મળતી સહાય વધારીને સીધી રૂ.1 કરોડ કરી દેવામાં આવી છે. સૈનીએ ભારપૂર્વક જણાવ્યું હતું કે, જે જવાનોએ દેશની સરહદો માટે પોતાનું લોહી રેડ્યું છે, તેમના પરિવારોને સન્માનજનક જીવન આપવાની જવાબદારી રાજ્ય સરકારની છે.

માત્ર શહીદો જ નહીં, પરંતુ દેશની આઝાદીની લડાઈમાં લડનારા સ્વાતંત્ર્ય સેનાનીઓ અને તેમની વિધવાઓ માટે પણ સરકારે ઉદારતા દાખવી છે. મુખ્યમંત્રીએ જાહેરાત કરી છે કે હવે સ્વાતંત્ર્ય સેનાનીઓનું માસિક પેન્શન વધારીને રૂ.40,000 કરવામાં આવ્યું છે. આ નિર્ણયથી રાજ્યના હજારો પરિવારોને આર્થિક ટેકો મળશે. સરકારના આ પગલાને શહીદો અને ક્રાંતિકારીઓ પ્રત્યેની સાચી શ્રદ્ધાંજલિ માનવામાં આવી રહી છે, જેમના ત્યાગને કારણે આજે ભારત આઝાદીનો શ્વાસ લઈ રહ્યું છે.

રોજગારીના મોરચે પણ મુખ્યમંત્રીએ બે મોટા અને નિર્ણાયક કદમ ઉઠાવ્યા છે. રાજ્ય સરકારે શહીદોના 418 આશ્રિતોને વિવિધ સરકારી વિભાગોમાં નોકરી આપવાની પ્રક્રિયા પૂર્ણ કરવાનો નિર્ણય લીધો છે. આ ઉપરાંત, કેન્દ્ર સરકારની અગ્નિવીર યોજના હેઠળ સેવા આપીને પરત ફરતા યુવાનો માટે પણ હરિયાણામાં નવી તકોના દ્વાર ખુલ્યા છે. મુખ્યમંત્રીએ અગ્નિવીરો માટે રાજ્યની સરકારી નોકરીઓમાં 10% અનામત આપવાની મહત્વની જાહેરાત કરી છે, જેથી સેનામાંથી નિવૃત્ત થયા બાદ આ યુવાનોને ભટકવું ન પડે.

મુખ્યમંત્રીની આ શ્રેણીબદ્ધ જાહેરાતોએ હરિયાણામાં સૈનિકો અને તેમના પરિવારોમાં ખુશીની લહેર ફેલાવી દીધી છે. નાયબ સિંહ સૈનીએ સ્પષ્ટ કર્યું કે તેમની સરકાર 'સૈનિક અને ખેડૂત' (જય જવાન-જય કિસાન) ના સૂત્રને પ્રાધાન્ય આપી રહી છે. આ યોજનાઓના અમલીકરણ માટે સંબંધિત વિભાગોને તાત્કાલિક આદેશો પણ આપી દેવામાં આવ્યા છે. આગામી સમયમાં આ નિર્ણયો અન્ય રાજ્યો માટે પણ માર્ગદર્શક બની શકે છે, જે સૈન્ય પ્રધાન ધરાવતા હરિયાણા માટે એક મોટી સિદ્ધિ સામાન છે.