મુંબઈ:  માયાનગરી મુંબઈના ગ્લેમર પાછળ છુપાયેલો એક ભયાનક અને કાળો ચહેરો ફરી એકવાર સામે આવ્યો છે. રણવીર સિંહની ફિલ્મ 'ધુરંધર'માં જોવા મળેલો અભિનેતા નદીમ ખાન અત્યારે ગંભીર ગુનાના આરોપમાં પોલીસની કસ્ટડીમાં છે. 41 વર્ષીય પીડિત મહિલા, જે ફિલ્મી સિતારાઓને ત્યાં ઘરેલુ સહાયિકા તરીકે કામ કરતી હતી, તેણે અભિનેતા પર જે આરોપો લગાવ્યા છે તેનાથી આખું બોલિવૂડ સ્તબ્ધ છે. આરોપ મુજબ, નદીમ ખાને પીડિતાને લગ્નનું ખોટું વચન આપીને છેલ્લા 10 વર્ષથી તેની મજબૂરીનો ફાયદો ઉઠાવ્યો હતો અને સતત જાતીય શોષણ કરતો રહ્યો હતો.

પીડિતાની આપવીતી મુજબ, આ શોષણનો સિલસિલો માલવણીથી શરૂ થઈને વર્સોવા સુધીના લક્ઝુરિયસ એપાર્ટમેન્ટ્સમાં ચાલ્યો હતો. અભિનેતાએ વિશ્વાસ અપાવ્યો હતો કે તે તેને પત્ની તરીકે સ્વીકારશે, પરંતુ 10 વર્ષ સુધી હવસ સંતોષ્યા બાદ જ્યારે લગ્નનો સમય આવ્યો ત્યારે નદીમે સ્પષ્ટ ઈનકાર કરી દીધો હતો. વિશ્વાસઘાત અને પીડાથી હારી ગયેલી મહિલાએ છેવટે હિંમત ભેગી કરી વર્સોવા પોલીસ સ્ટેશનના દ્વાર ખખડાવ્યા હતા. પોલીસે આ મામલાની ગંભીરતા જોઈને 'ઝીરો FIR' નોંધી કેસ માલવણી પોલીસને સોંપ્યો અને 22 જાન્યુઆરીએ નદીમ ખાનને હાથકડી પહેરાવી જેલ ભેગો કરી દીધો.

નદીમ ખાનની ધરપકડ બાદ હવે ફિલ્મ ઈન્ડસ્ટ્રીમાં આ વિષય ચર્ચાનો કેન્દ્ર બન્યો છે. ખાસ કરીને હાઈ-પ્રોફાઈલ લાઈફસ્ટાઈલ ધરાવતા કલાકારો દ્વારા સામાન્ય શ્રમિક વર્ગની મહિલાઓનું જે રીતે શોષણ કરવામાં આવે છે, તેના પર ફરી એકવાર સવાલો ઉભા થયા છે. અત્યારે નદીમ ખાન પોલીસ કસ્ટડીમાં છે અને પોલીસ તેના મોબાઈલ ડેટા તેમજ અન્ય પુરાવાઓની તપાસ કરી રહી છે. આ ઘટનાએ એ સાબિત કર્યું છે કે પડદા પર દેખાતા સિતારાઓનું અંગત જીવન ઘણીવાર અત્યંત અંધકારમય હોઈ શકે છે.