મુંબઈ : પ્રયાગરાજની પવિત્ર ધરતી પર માઘ મેળા દરમિયાન શંકરાચાર્ય અવિમુક્તેશ્વરાનંદ અને વહીવટીતંત્ર વચ્ચે જે 'ધર્મયુદ્ધ' છેડાયું છે, તેમાં હવે બાગેશ્વર ધામના પંડિત ધીરેન્દ્ર કૃષ્ણ શાસ્ત્રીએ ઝંપલાવ્યું છે. મુંબઈમાં બાગેશ્વર સનાતન મઠના પ્રથમ વાર્ષિક ઉત્સવ પ્રસંગે હાજર રહેલા શાસ્ત્રીએ ખૂબ જ ગંભીરતાથી જણાવ્યું કે, જ્યારે બંને પક્ષો સનાતની હોય ત્યારે વિવાદ રસ્તા પર નહીં પણ બંધ બારણે ચર્ચાથી ઉકેલવો જોઈએ. તેમણે સ્પષ્ટ શબ્દોમાં ચેતવણી આપી કે જો આપણે અંદરોઅંદર લડીશું તો જગત સનાતન ધર્મની મજાક ઉડાવશે, જે કોઈપણ સંજોગોમાં સહન કરી શકાય નહીં.

પ્રયાગરાજના માઘ મેળામાં મૌની અમાવસ્યાના દિવસે શંકરાચાર્યના શિષ્યો સાથે થયેલી કથિત ગેરવર્તણૂક અને તેમને ગંગા સ્નાન કરતા અટકાવવાની ઘટનાએ સંત સમાજમાં રોષ ભભુક્યો છે. આ વિવાદ હવે શંકરાચાર્યના પદની માન્યતા સુધી પહોંચી ગયો છે ત્યારે ધીરેન્દ્ર શાસ્ત્રીએ સરકાર અને સંતો વચ્ચે સેતુ બનવાનો પ્રયાસ કર્યો છે. તેમણે રાજકારણીઓના અનિયંત્રિત નિવેદનો પર પણ કટાક્ષ કરતા કહ્યું કે, ઈશ્વર આવા લોકોને સદબુદ્ધિ આપે જેઓ ધર્મના મામલામાં તેલ રેડવાનું કામ કરે છે. બાબાએ ભાર મૂક્યો કે સનાતન સંસ્કૃતિની ગરિમા જાળવવી એ દરેક પક્ષની પ્રથમ નૈતિક જવાબદારી છે.

પ્રજાસત્તાક પર્વના પવિત્ર દિવસે તિરંગો લહેરાવતા ધીરેન્દ્ર શાસ્ત્રીએ દેશભક્તિનો પણ નવો રંગ જમાવ્યો હતો. તેમણે મુંબઈની ધરતી પરથી સંદેશ આપ્યો કે રામભક્તિ અને રાષ્ટ્રભક્તિ એક જ સિક્કાની બે બાજુ છે. ભારતીય સેનાના જવાનોની પ્રશંસા કરતા તેમણે કહ્યું કે, સરહદ પર સૈનિકો જાગે છે એટલે જ આજે આપણે સુખેથી તિરંગો લહેરાવી શકીએ છીએ. તેમણે નાગરિકોને અપીલ કરી કે સૈનિકોના પરિવારનું ધ્યાન રાખવું એ આપણી નૈતિક ફરજ છે. આમ, શંકરાચાર્ય વિવાદથી લઈને સૈનિકોના સન્માન સુધી, બાગેશ્વર બાબાએ મુંબઈથી સનાતન એકતાનો મજબૂત હુંકાર કર્યો છે.