નવી દિલ્હી:  દિલ્હીમાં પ્રજાસત્તાક દિવસ એટલે સામાન્ય રીતે ગાઢ ધુમ્મસ અને ઝેરી સ્મોગનું સામ્રાજ્ય, પરંતુ ૨૦૨૬ના વર્ષે કુદરતે દિલ્હીવાસીઓને એક અદભૂત ભેટ આપી છે. છેલ્લા ૧૧ વર્ષના ઈતિહાસમાં આ બીજો એવો અવસર હતો જ્યારે રાજધાનીની હવા આટલી સ્વચ્છ રહી હોય. સોમવારે જ્યારે કર્તવ્ય પથ પર શક્તિ પ્રદર્શન થઈ રહ્યું હતું, ત્યારે આકાશ ચોખ્ખું હતું અને હવા પ્રમાણમાં શુદ્ધ હતી. જોકે AQI ૨૪૧ નોંધાયો હતો જે ટેકનિકલી 'ખરાબ' શ્રેણીમાં ગણાય, પરંતુ દિલ્હીના શિયાળાના ઈતિહાસને જોતા આ આંકડો પણ એક મોટી રાહત સમાન માનવામાં આવી રહ્યો છે.

હવામાન વિભાગના જણાવ્યા અનુસાર, તેજ પવન અને ખીલેલા સૂર્યપ્રકાશને કારણે પ્રદૂષણના કણો હવામાં ટકી શક્યા નથી. ગત વર્ષે ૨૦૨૫માં AQI ૨૧૬ સાથે રેકોર્ડબ્રેક સ્વચ્છતા જોવા મળી હતી, જેની સરખામણીએ આ વર્ષે પ્રદૂષણ થોડું વધારે રહ્યું હોવા છતાં પાછલા દાયકાની સરખામણીમાં આ સ્થિતિ ઘણી બહેતર છે. રવિવારે AQI ૧૫૩ હતો, જે ૨૪ કલાકમાં વધીને ૨૪૧ થયો છે, તેમ છતાં પરેડ જોવા ઉમટેલા લાખો લોકો માટે દમ ઘોંટનારા પ્રદૂષણની ગેરહાજરી એક મોટું આશ્વાસન સાબિત થઈ હતી.

જોકે, દિલ્હીના તમામ વિસ્તારોમાં સ્થિતિ સમાન નહોતી. આનંદ વિહાર વિસ્તાર હજુ પણ ૩૦૧ AQI સાથે પ્રદૂષણનું કેન્દ્ર બની રહ્યો છે, જે 'ખૂબ જ ખરાબ' શ્રેણીની નજીક છે. તેર વિસ્તારોમાં હવા 'મધ્યમ' રહી જ્યારે ૨૫ વિસ્તારોમાં હવા 'ખરાબ' નોંધાઈ હતી. રાહતની વાત એ છે કે પૃથ્વી વિજ્ઞાન મંત્રાલયની આગાહી મુજબ, આગામી થોડા દિવસો સુધી પ્રદૂષણના સ્તરમાં કોઈ મોટો ઉછાળો નહીં આવે. NCR શહેરોમાં હવા 'મધ્યમ' થી 'ખરાબ' ની વચ્ચે હિલોળા લેશે, જે શિયાળાની આ સિઝનમાં દિલ્હી માટે એક દુર્લભ લ્હાવો છે.