દુબઈ:મધ્ય પૂર્વમાં યુદ્ધના વાદળો ઘેરાઈ રહ્યા છે ત્યારે સંયુક્ત આરબ અમીરાતે (UAE) એક અત્યંત ચોંકાવનારો અને વ્યૂહાત્મક નિર્ણય જાહેર કરીને વિશ્વ સત્તા અમેરિકાને સ્પષ્ટ સંકેત આપી દીધો છે. ઈરાન પર અમેરિકાના સંભવિત લશ્કરી હુમલાની અટકળો વચ્ચે, UAE એ સત્તાવાર જાહેરાત કરી છે કે તે કોઈપણ સંજોગોમાં પડોશી દેશ વિરુદ્ધ થનારી સૈન્ય કાર્યવાહી માટે પોતાની જમીન, હવાઈ ક્ષેત્ર કે દરિયાઈ સીમાનો ઉપયોગ કરવા દેશે નહીં. આ જાહેરાતે વૈશ્વિક રાજકારણમાં ખળભળાટ મચાવ્યો છે, કારણ કે UAE લાંબા સમયથી અમેરિકાનો ગાઢ સાથી રહ્યો છે અને ત્યાં અનેક અમેરિકન સૈન્ય મથકો પણ આવેલા છે.

અમેરિકામાં ડોનાલ્ડ ટ્રમ્પના વહીવટીતંત્ર દ્વારા ઈરાન વિરુદ્ધ આકરી લશ્કરી કાર્યવાહીની અવારનવાર અપાતી ધમકીઓ વચ્ચે UAEનું આ વલણ ઘણું મહત્વનું માનવામાં આવે છે. ઈરાનના સુપ્રીમ લીડર આયાતુલ્લાહ અલી ખામેનીએ પણ વળતા પ્રહારની ચેતવણી આપી છે, જેના કારણે સમગ્ર ખાડી વિસ્તારમાં અસ્થિરતાનો ભય પેદા થયો છે. યુએઈના વિદેશ મંત્રાલયે ભારપૂર્વક જણાવ્યું છે કે તેઓ પોતાની પ્રાદેશિક અખંડિતતાના રક્ષણ માટે કટિબદ્ધ છે. આ નિવેદન દ્વારા યુએઈએ સાબિત કર્યું છે કે તેઓ હવે અમેરિકાના પ્યાદા બનવાને બદલે પોતાના પ્રાદેશિક હિતો અને શાંતિને વધુ મહત્વ આપી રહ્યા છે.

નોંધનીય છે કે, UAE અને અમેરિકા વચ્ચેના સંરક્ષણ સંબંધો અત્યંત ગાઢ છે, તેમ છતાં ઈરાન સાથેના સીધા સંઘર્ષમાં ઉતરવાનું જોખમ યુએઈ ઉઠાવવા માંગતું નથી. મંત્રાલયે સ્પષ્ટ કર્યું છે કે કોઈપણ પ્રાદેશિક વિવાદનો ઉકેલ માત્ર રાજદ્વારી વાતચીત અને આંતરરાષ્ટ્રીય કાયદાઓ દ્વારા જ આવવો જોઈએ. ઈરાન પ્રત્યેના આ સકારાત્મક વલણ પાછળ પડોશી દેશો સાથેના સંબંધો સુધારવાની અને યુદ્ધના કારણે થનારા આર્થિક નુકસાનથી બચવાની યુએઈની ગણતરી સ્પષ્ટપણે દેખાઈ રહી છે. આ પગલાથી અમેરિકા માટે ઈરાન પર હુમલો કરવાનું લશ્કરી આયોજન હવે વધુ જટિલ બની શકે છે.

હવે આખા વિશ્વની નજર વ્હાઇટ હાઉસ પર છે કે ટ્રમ્પ સરકાર યુએઈના આ ઇનકાર પછી પોતાની રણનીતિમાં શું ફેરફાર કરે છે. જો અમેરિકા ઈરાન વિરુદ્ધ ઓપરેશન શરૂ કરે છે, તો તેણે લશ્કરી લોજિસ્ટિક્સ અને વિમાન ઉડ્ડયન માટે અન્ય વિકલ્પો શોધવા પડશે, જે વ્યૂહાત્મક રીતે ખૂબ મોંઘા સાબિત થઈ શકે છે. બીજી તરફ, યુએઈના આ વલણથી ઈરાનને મોટી રાજદ્વારી રાહત મળી છે. ખાડી દેશોમાં બદલાતી આ ભૌગોલિક-રાજકીય સ્થિતિ આગામી સમયમાં નવા સમીકરણો રચશે તે નક્કી છે.