રાંચી:  ઝારખંડમાં પ્રજાસત્તાક પર્વની ઉજવણી માત્ર ધ્વજવંદન પૂરતી મર્યાદિત ન રહી, પરંતુ તે રાજ્યમાં શાંતિ અને સુરક્ષાના નવા યુગની જાહેરાત બની રહી. પોલીસ મુખ્યાલય ખાતે આયોજિત કાર્યક્રમમાં રાજ્યના પોલીસ મહાનિર્દેશક (ડીજીપી) તદાશા મિશ્રાએ નક્સલવાદ સામેના જંગનો સંપૂર્ણ હિસાબ રજૂ કર્યો હતો. તેમણે ગર્વ સાથે જણાવ્યું કે વર્ષ ૨૦૨૫ દરમિયાન ઝારખંડ પોલીસે ૩૨ નક્સલીઓને એન્કાઉન્ટરમાં ઠાર કર્યા છે, જ્યારે ૩૨૬ જેટલા આતંકીઓને જેલ ભેગા કર્યા છે. આ આંકડાઓ સ્પષ્ટ કરે છે કે સુરક્ષા દળોએ માઓવાદીઓના મનસૂબા તોડવા માટે જમીની સ્તરે આક્રમક રણનીતિ અપનાવી છે.

માત્ર નક્સલવાદ જ નહીં, પરંતુ ઝારખંડ પોલીસની એન્ટી ટેરરિસ્ટ સ્ક્વોડ (ATS) એ પણ રાજ્યને મોટી હોનારતમાંથી બચાવ્યું છે. ડીજીપીના જણાવ્યા અનુસાર, 'હિઝબુત-તહરિર' જેવા આતંકવાદી સંગઠનના સભ્યો સહિત ૩૦ ખતરનાક ગુનેગારોની ધરપકડ કરીને આતંકવાદના મૂળિયાં ઉખેડી નાખવામાં આવ્યા છે. આ ઉપરાંત, આ વર્ષે ૩૮ નક્સલીઓએ મુખ્ય પ્રવાહમાં જોડાવા માટે આત્મસમર્પણ કર્યું છે, જે દર્શાવે છે કે સરકારની પુનઃવસન નીતિની અસર દેખાઈ રહી છે. આ સફળતાના અહેવાલે સુરક્ષા દળોમાં નવો ઉત્સાહ ભર્યો છે અને સામાન્ય જનતામાં સુરક્ષાનો વિશ્વાસ મજબૂત કર્યો છે.

ગુનાખોરીના અન્ય મોરચા પર પણ પોલીસે કડક વલણ અપનાવ્યું છે. ગયા વર્ષે ડ્રગ્સ હેરફેર સામે લાલ આંખ કરીને પોલીસે આશરે ₹૫૮.૭૭ કરોડનો નશીલો પદાર્થ જપ્ત કર્યો છે અને ૮૮૩ આરોપીઓને જેલની હવા ખાવા મજબૂર કર્યા છે. સાયબર ક્રાઈમના વધતા જતા જોખમ સામે પણ પોલીસે ૧૨૬૮ ગુનેગારોની ધરપકડ કરી કરોડો રૂપિયા રિકવર કર્યા છે. ૧૦૦૮ મોબાઈલ અને ૧૩૩૨ સિમ કાર્ડ જપ્ત કરીને સાયબર માફિયાઓના નેટવર્કને ધ્વસ્ત કરી દેવામાં આવ્યું છે. ડીજીપી તદાશા મિશ્રાએ ખાતરી આપી છે કે ઝારખંડને સંપૂર્ણપણે નક્સલમુક્ત અને સુરક્ષિત બનાવવાની દિશામાં પોલીસ હજુ પણ વધુ આક્રમક રીતે આગળ વધશે.