રતલામ:મધ્યપ્રદેશના રતલામમાં પ્રજાસત્તાક પર્વની હર્ષોલ્લાસભરી સાંજ ક્ષણવારમાં ચીસાચીસ અને આક્રંદમાં ફેરવાઈ ગઈ હતી. શહેરના સૌથી ધમધમતા અને ગીચ રહેણાંક વિસ્તાર ગણાતા ચાંદની ચોકમાં આવેલી એક બંદૂકની દુકાનમાં અચાનક પ્રચંડ વિસ્ફોટ સાથે ભીષણ આગ ફાટી નીકળી હતી. આ બ્લાસ્ટ એટલો શક્તિશાળી હતો કે તેનો અવાજ દૂર-દૂર સુધી સંભળાયો હતો અને જોતજોતામાં આખી દુકાન કાળા ધુમાડાના ગોટા અને આગની લપેટમાં આવી ગઈ હતી. રસ્તા પર પસાર થતા લોકો કઈ સમજે તે પહેલા જ અરાજકતાનો માહોલ સર્જાયો હતો અને લોકો જીવ બચાવવા સુરક્ષિત સ્થળે દોડવા લાગ્યા હતા.

ઘટનાના જે સીસીટીવી અને વીડિયો સામે આવ્યા છે તે કાળજું કંપાવી દે તેવા છે. આગ લાગ્યા બાદ દુકાનની અંદર રહેલા લોકો રીતસરના સળગતી હાલતમાં બહાર ભાગતા નજરે પડ્યા હતા. સ્થાનિક લોકોએ જણાવ્યું કે વિસ્ફોટના અવાજ બાદ અચાનક જ દુકાનમાંથી આગની જ્વાળાઓ નીકળવા માંડી હતી. આ અકસ્માતમાં દુકાન માલિક યુસુફ બંદૂકવાલા, બે કર્મચારીઓ અને એક ગ્રાહક સહિત કુલ ચાર લોકો ગંભીર રીતે દાઝી ગયા હતા. ઘટનાની ગંભીરતા જોતા ફાયર બ્રિગેડ અને પોલીસનો કાફલો તાત્કાલિક સ્થળ પર પહોંચ્યો હતો અને બચાવ કામગીરી હાથ ધરી હતી.

ઈજાગ્રસ્તોને તાત્કાલિક પોલીસ વાહનો મારફતે નજીકની હોસ્પિટલ ખસેડવામાં આવ્યા હતા, પરંતુ તે પૈકી ત્રણની હાલત અત્યંત નાજુક જણાતા તેમને વધુ સારવાર માટે ઈન્દોર રિફર કરવામાં આવ્યા છે. ડોક્ટરોના જણાવ્યા મુજબ, ઈજાગ્રસ્તો મોટાભાગે દાઝી ગયા હોવાથી તેમની સ્થિતિ અત્યારે ચિંતાજનક છે. આ ભયાનક દુર્ઘટનાને પગલે સમગ્ર ચાંદની ચોક વિસ્તારમાં ભયનો માહોલ જોવા મળી રહ્યો છે. રહેણાંક વિસ્તારની વચ્ચે આટલો મોટો દારૂગોળો અને બંદૂકોનો જથ્થો હોવો તે સુરક્ષા સામે મોટા સવાલો ઊભા કરી રહ્યો છે.

આ મામલે જિલ્લા વહીવટી તંત્ર અને મહેસૂલ અધિકારીઓએ તપાસના ચક્રો ગતિમાન કર્યા છે. બંદૂકની દુકાનમાં વિસ્ફોટ થવાનું કારણ હજુ સુધી સ્પષ્ટ થયું નથી, પરંતુ પ્રાથમિક અનુમાન મુજબ શોર્ટ સર્કિટ અથવા કોઈ વિસ્ફોટક સામગ્રીમાં લાગેલી આગ આ દુર્ઘટના માટે જવાબદાર હોઈ શકે છે. રહેણાંક વિસ્તારમાં આવી જોખમી દુકાનોના લાયસન્સ અને સુરક્ષાના નિયમોને લઈને હવે લોકોમાં ભારે રોષ જોવા મળી રહ્યો છે. પોલીસ અત્યારે ફોરેન્સિક ટીમની મદદથી પુરાવા એકત્ર કરી રહી છે જેથી બ્લાસ્ટનું ચોક્કસ કારણ જાણી શકાય.