ક્વેટા:પાકિસ્તાનમાં અસ્થિરતા અને હિંસાનો સિલસિલો અટકવાનું નામ નથી લઈ રહ્યો. આજે ફરી એકવાર બલૂચ આતંકીઓએ પાકિસ્તાન રેલવેની ‘જાફર એક્સપ્રેસ’ને નિશાન બનાવી લોહિયાળ ખેલ ખેલ્યો છે. સિંધના શિકારપુર અને જેકોબાદ વચ્ચે આવેલા સુલતાન કોટ શહેર નજીક રેલવે ટ્રેક પર હાઈ-ઈન્ટેન્સિટી IED (ઇમ્પ્રુવાઇઝ્ડ એક્સપ્લોઝિવ ડિવાઇસ) દ્વારા પ્રચંડ વિસ્ફોટ કરવામાં આવ્યો હતો. આ બ્લાસ્ટ ત્યારે થયો જ્યારે ક્વેટાથી રાવલપિંડી જતી ટ્રેન ત્યાંથી પસાર થઈ રહી હતી. વિસ્ફોટ એટલો શક્તિશાળી હતો કે ટ્રેનના ત્રણ ડબ્બા પાટા પરથી ઉતરી ગયા હતા અને સમગ્ર વિસ્તારમાં ચીસાચીસ અને ભયનો માહોલ છવાઈ ગયો હતો.

આ હુમલાની જવાબદારી બલૂચ રિપબ્લિકન ગાર્ડ્સ (BRG) એ સ્વીકારી છે. સંગઠને 26 જાન્યુઆરી, 2026 ના રોજ જારી કરેલા એક સત્તાવાર નિવેદનમાં દાવો કર્યો છે કે તેમના કમાન્ડોએ રિમોટ કંટ્રોલ દ્વારા આ બ્લાસ્ટ કર્યો હતો. BRG ના મતે, આ ટ્રેનમાં પાકિસ્તાની સેનાના જવાનો મોટી સંખ્યામાં મુસાફરી કરી રહ્યા હતા અને તેમને જ નિશાન બનાવવાનો હેતુ હતો. આતંકી સંગઠને દાવો કર્યો છે કે આ હુમલામાં પાકિસ્તાની સેનાના અનેક જવાનો માર્યા ગયા છે અને ઘણા ગંભીર રીતે ઘાયલ થયા છે. તેમણે ચેતવણી આપી છે કે જ્યાં સુધી બલૂચિસ્તાન આઝાદ નહીં થાય ત્યાં સુધી પાકિસ્તાની સત્તા અને સેના પર આવા હુમલા ચાલુ રહેશે.

જાફર એક્સપ્રેસ પાછલા એક વર્ષથી બલૂચ વિદ્રોહીઓના નિશાન પર રહી છે. ઇતિહાસ પર નજર કરીએ તો, માર્ચ 2025 માં બલૂચિસ્તાન લિબરેશન આર્મી (BLA) એ પણ આ ટ્રેન પર મોટો હુમલો કર્યો હતો. વર્ષ 2025 દરમિયાન જૂન, ઓગસ્ટ, સપ્ટેમ્બર અને ઓક્ટોબરમાં શ્રેણીબદ્ધ વિસ્ફોટો દ્વારા રેલવે નેટવર્કને તોડવાનો પ્રયાસ કરવામાં આવ્યો હતો. સપ્ટેમ્બર 2025 માં મસ્તુંગ વિસ્તારમાં થયેલા બ્લાસ્ટમાં મહિલાઓ અને બાળકો સહિત 12 લોકો ઘાયલ થયા હતા. વારંવાર થતા આ હુમલાઓએ પાકિસ્તાની સુરક્ષા એજન્સીઓની પોલ ખોલી નાખી છે અને મુસાફરોમાં રેલવે મુસાફરીને લઈને ફફડાટ પેદા કર્યો છે.

આ ઘટના બાદ પાકિસ્તાની સેના અને સુરક્ષા દળોએ વિસ્તારને ઘેરી લઈને સર્ચ ઓપરેશન શરૂ કર્યું છે. જોકે, પહાડી અને દુર્ગમ વિસ્તારોનો લાભ લઈને આતંકીઓ ફરાર થઈ જવામાં સફળ રહેતા હોય છે. રેલવે ટ્રેક ક્ષતિગ્રસ્ત થવાને કારણે ક્વેટા અને પેશાવર વચ્ચેનો રેલ વ્યવહાર ખોરવાઈ ગયો છે, જેનાથી હજારો મુસાફરો અટવાયા છે. આંતરરાષ્ટ્રીય સ્તરે પણ પાકિસ્તાનની સુરક્ષા વ્યવસ્થા સામે સવાલો ઉઠી રહ્યા છે. એકતરફ આર્થિક કટોકટી અને બીજી તરફ આંતરિક બળવાખોરીને કારણે પાકિસ્તાન અત્યારે અત્યંત નાજુક સ્થિતિમાંથી પસાર થઈ રહ્યું છે.