ભારતમાં ઈન્ફ્રાસ્ટ્રક્ચર ક્ષેત્રે એક નવો અધ્યાય લખાવા જઈ રહ્યો છે. મહારાષ્ટ્રમાં દેશનું સૌપ્રથમ 'ઓફશોર એરપોર્ટ' (દરિયાની અંદર જમીન બનાવીને તૈયાર કરાયેલું એરપોર્ટ) બનાવવાની તૈયારીઓ શરૂ થઈ ગઈ છે. અંદાજે પિસ્તાલીસ હજાર કરોડ રૂપિયાના જંગી ખર્ચે તૈયાર થનારું આ એરપોર્ટ એન્જિનિયરિંગની દ્રષ્ટિએ એક અજાયબી સમાન હશે. જમીન સંપાદનની મુશ્કેલીઓ નિવારવા અને મુંબઈ જેવા ગીચ શહેરોમાં જગ્યાના અભાવને પહોંચી વળવા માટે આ ક્રાંતિકારી વિચાર અમલમાં મૂકવામાં આવી રહ્યો છે.

આ પ્રસ્તાવિત એરપોર્ટની ક્ષમતા એટલી વિશાળ હશે કે તે વાર્ષિક ૯૦ મિલિયન (નવ કરોડ) મુસાફરોને હેન્ડલ કરી શકશે. આ પ્રોજેક્ટ જાપાનના કાન્સી અને હોંગકોંગના ઈન્ટરનેશનલ એરપોર્ટની તર્જ પર વિકસાવવામાં આવશે. મુંબઈના હાલના એરપોર્ટ પર વધી રહેલા અસહ્ય ભારણને ઘટાડવા માટે આ ઓફશોર એરપોર્ટ સંજીવની સમાન સાબિત થશે. દરિયામાં રિકલેમેશન દ્વારા જમીન ઊભી કરીને રનવે અને ટર્મિનલ બનાવવામાં આવશે.

સરકારી સૂત્રોના જણાવ્યા અનુસાર, આ એરપોર્ટને મુખ્ય ભૂમિ સાથે જોડવા માટે સમુદ્ર પર લાંબા બ્રિજ અને અંડરવોટર ટનલ તેમજ મેટ્રો કનેક્ટિવિટીનું આયોજન પણ વિચારણા હેઠળ છે. આ પ્રોજેક્ટથી મહારાષ્ટ્રના પર્યટન અને વેપાર ઉદ્યોગને જબરદસ્ત વેગ મળશે. 

પર્યાવરણીય મંજૂરીઓ અને ટેકનિકલ સર્વેની કામગીરી પૂર્ણ થયા બાદ ટૂંક સમયમાં જ આ મહત્વાકાંક્ષી પ્રોજેક્ટનું ખાતમુહૂર્ત કરવામાં આવે તેવી શક્યતા છે. આ એરપોર્ટ ભારતની આધુનિક માળખાગત સુવિધાઓનું વૈશ્વિક પ્રતીક બની રહેશે.