દક્ષિણ અમેરિકાના દેશ વેનેઝુએલામાં એક નાટ્યાત્મક ઘટનાક્રમમાં અમેરિકાની આગેવાની હેઠળના સૈન્ય હસ્તક્ષેપ અથવા દબાણ બાદ રાતોરાત મોટો બદલાવ આવ્યો છે. અમેરિકી રાષ્ટ્રપતિ ડોનાલ્ડ ટ્રમ્પે જાહેર કર્યું છે કે વેનેઝુએલાના શાસન દ્વારા વર્ષોથી જેલમાં બંધ સેંકડો રાજકીય કેદીઓને મુક્ત કરવાની પ્રક્રિયા શરૂ કરી દેવામાં આવી છે. અહેવાલો અનુસાર, અમેરિકી દળોના 'રેડ' અથવા દબાણની નીતિ બાદ નિકોલસ માદુરોની સરકાર બેકફૂટ પર આવી ગઈ હતી.

ટ્રમ્પે પોતાના સોશિયલ મીડિયા પ્લેટફોર્મ પર આ ઘટનાની ભરપેટ પ્રશંસા કરતા લખ્યું છે કે, "વેનેઝુએલાએ રાજકીય કેદીઓને મોટા પાયે મુક્ત કરવાનું શરૂ કર્યું છે. અમેરિકા ત્યાં પહોંચ્યું અને જે કરવું જરૂરી હતું તે કર્યું, જેના કારણે આ કેદીઓનું નસીબ ખૂલી ગયું છે." 

મુક્ત થયેલા લોકોમાં વિપક્ષી નેતાઓ, પત્રકારો અને માનવાધિકાર કાર્યકરોનો સમાવેશ થાય છે. આંતરરાષ્ટ્રીય સ્તરે આ ઘટનાને અમેરિકાની મોટી કૂટનીતિક અને લશ્કરી જીત તરીકે જોવામાં આવી રહી છે.