લંડન, તા. 27 : વૈશ્વિક રાજકારણમાં એક મોટો વળાંક જોવા મળી રહ્યો છે. બ્રિટનના વડાપ્રધાન કીર સ્ટાર્મર મંગળવારે ચીનની મહત્વપૂર્ણ મુલાકાતે જઈ રહ્યા છે. છેલ્લા આઠ વર્ષમાં ચીનની મુલાકાત લેનારા તેઓ પ્રથમ બ્રિટિશ નેતા છે. આ મુલાકાત એવા સમયે થઈ રહી છે જ્યારે બ્રિટન અને તેના વર્ષો જૂના સાથી અમેરિકા વચ્ચે ડોનાલ્ડ ટ્રમ્પની 'ગ્રીનલેન્ડ' કબજે કરવાની ધમકીઓને કારણે તણાવ ચરમસીમાએ છે.
સ્ટાર્મરની આ મુલાકાતનો મુખ્ય ઉદ્દેશ્ય બ્રિટનની ડગમગતી અર્થવ્યવસ્થાને બેઠી કરવાનો અને અમેરિકા પરની નિર્ભરતા ઘટાડવાનો છે. નિષ્ણાતોનું માનવું છે કે, આર્ટિફિશિયલ ઈન્ટેલિજન્સ (AI), જાહેર આરોગ્ય અને પર્યાવરણ જેવા વૈશ્વિક મુદ્દાઓ પર હાલમાં લંડન વોશિંગ્ટન કરતા બેઇજિંગની વધુ નજીક દેખાઈ રહ્યું છે. 2024 માં સત્તામાં આવ્યા પછી, સ્ટાર્મરે ચીન સાથે બગડેલા સંબંધોને સુધારવાને પોતાની પ્રાથમિકતા ગણાવી છે.
જોકે, બ્રિટનની આ 'ચીન તરફી' ચાલની ઘરઆંગણે અને અમેરિકામાં આકરી ટીકા થઈ રહી છે. વિવેચકોનું કહેવું છે કે ચીન સાથેના વેપારથી બ્રિટનને આર્થિક રીતે બહુ ઓછો ફાયદો થયો છે, કારણ કે બ્રિટનમાં કુલ વિદેશી રોકાણમાં ચીનનો હિસ્સો માત્ર 0.2% છે, જ્યારે અમેરિકાનો હિસ્સો ત્રીજા ભાગનો છે. તેમ છતાં, સ્ટાર્મર વેપાર અને રાષ્ટ્રીય સુરક્ષા વચ્ચે સંતુલન જાળવીને ચીન સાથે 100 અબજ પાઉન્ડના વેપારને આગળ વધારવા માંગે છે.
તાજેતરમાં જ કેનેડાએ પણ ચીન સાથે આર્થિક કરાર કર્યા હતા, જેના જવાબમાં ટ્રમ્પે કેનેડા પર 100% ટેરિફ લાદવાની ધમકી આપી હતી. હવે જોવાનું એ રહેશે કે બ્રિટિશ પીએમની આ બેઇજિંગ અને શાંઘાઈની મુલાકાત બાદ વ્હાઇટ હાઉસ કેવો પ્રતિભાવ આપે છે અને શું આ પ્રવાસથી બ્રિટિશ જનતાના જીવનધોરણમાં વાસ્તવિક સુધારો આવશે ખરો?