નવી દિલ્હી : ભારત અને યુરોપિયન યુનિયન (EU) વચ્ચે જ્યારે ‘બધા સોદાઓની માતા’ ગણાતા ઐતિહાસિક મુક્ત વેપાર કરાર પર હસ્તાક્ષર થઈ રહ્યા હતા, ત્યારે એક ભાવુક અને ગૌરવશાળી ક્ષણ જોવા મળી હતી. યુરોપિયન કાઉન્સિલના પ્રમુખ એન્ટોનિયો કોસ્ટાએ નવી દિલ્હીમાં સંયુક્ત સંબોધન દરમિયાન ખિસ્સામાંથી પોતાનું 'ઓવરસીઝ સિટીઝન ઓફ ઈન્ડિયા' (OCI) કાર્ડ કાઢીને દુનિયાને બતાવ્યું અને ગર્વથી કહ્યું કે, "હું ગોવાનો છું."
એન્ટોનિયો કોસ્ટાએ તેમના મૂળ વિશે વાત કરતા જણાવ્યું કે, ભલે તેઓ યુરોપિયન કાઉન્સિલના વડા હોય, પણ હૃદયથી તેઓ એક ભારતીય પણ છે. તેમના પિતાનો પરિવાર ગોવાના માર્ગાઓ શહેરનો છે. તેમણે ઉમેર્યું કે, "ગોવા મારા પિતાના લખાણોમાં, કોંકણી શબ્દોમાં અને સોરપોટેલ જેવી સ્થાનિક વાનગીઓની યાદોમાં હંમેશા જીવંત રહ્યું છે. યુરોપ અને ભારત વચ્ચેનું આ જોડાણ મારા માટે માત્ર વ્યાવસાયિક નથી, પણ અંગત છે."
પોર્ટુગલના પીએમથી યુરોપિયન ચીફ સુધીની સફર
એન્ટોનિયો કોસ્ટા પોર્ટુગલના ભૂતપૂર્વ વડા પ્રધાન રહી ચૂક્યા છે. તેમનો જન્મ લિસ્બનમાં થયો હતો, પરંતુ તેમના પિતા ઓર્લાન્ડો કોસ્ટા ગોઆન વંશના હતા. ગોવામાં તેમને આજે પણ પ્રેમથી 'બાબુશ' (કોંકણીમાં અર્થ: વહાલો છોકરો) તરીકે ઓળખવામાં આવે છે. માર્ગાઓના અબાડે ફારિયા રોડ પર તેમનું પૂર્વજોનું ઘર આજે પણ છે, જેની મુલાકાત તેમણે 2017માં લીધી હતી.
આ ઐતિહાસિક ક્ષણે વડાપ્રધાન નરેન્દ્ર મોદીએ પણ ભારત-EU સંબંધોને વૈશ્વિક સ્થિરતા માટે અનિવાર્ય ગણાવ્યા હતા. જ્યારે એક તરફ વિશ્વની બે મોટી આર્થિક શક્તિઓ વેપાર માટે હાથ મિલાવી રહી છે, ત્યારે એન્ટોનિયો કોસ્ટાના આ ભારતીય જોડાણે રાજદ્વારી સંબંધોમાં એક નવી આત્મીયતા ઉમેરી છે. આ મુલાકાતથી માત્ર આર્થિક જ નહીં, પણ સાંસ્કૃતિક સેતુ પણ વધુ મજબૂત બન્યો છે.