સિઓલ:  વિશ્વ અત્યારે રશિયા-યુક્રેન અને મધ્ય પૂર્વના સંઘર્ષો પર ધ્યાન કેન્દ્રિત કરી રહ્યું છે, ત્યારે પૂર્વ એશિયામાં સ્થિતિ અત્યંત ગંભીર બની ગઈ છે. મંગળવારે ઉત્તર કોરિયાએ ફરી એકવાર તેના પૂર્વ કિનારેથી સમુદ્ર તરફ એક 'રહસ્યમય' અને અજાણી મિસાઇલ છોડીને દક્ષિણ કોરિયામાં દહેશતનો માહોલ પેદા કરી દીધો છે. દક્ષિણ કોરિયાની સેનાના જણાવ્યા અનુસાર, આ પ્રક્ષેપણ માત્ર સામાન્ય પરીક્ષણ નથી, પરંતુ એક ઘાતક હથિયારનું પ્રદર્શન હોઈ શકે છે. આ હુમલો એવા સમયે થયો છે જ્યારે બંને દેશો વચ્ચે સરહદ પાર સર્વેલન્સ ડ્રોન ફ્લાઇટ્સને લઈને તણાવ તેની ચરમસીમાએ પહોંચ્યો છે. સિઓલમાં સંરક્ષણ મંત્રાલયે તાત્કાલિક સુરક્ષા બેઠક બોલાવી છે અને પોતાની સેનાને હાઈ-એલર્ટ પર મૂકી દીધી છે.

તાજેતરના અહેવાલો મુજબ, આ મિસાઇલ પ્રહાર દક્ષિણ કોરિયા દ્વારા કથિત રીતે મોકલવામાં આવેલા ડ્રોનનો બદલો હોવાનું માનવામાં આવે છે. જોકે, દક્ષિણ કોરિયાએ કોઈ પણ ડ્રોન ઉડાવ્યા હોવાનો સખત ઈનકાર કર્યો છે. વિશ્લેષકોનું માનવું છે કે જાન્યુઆરીના અંતમાં અથવા ફેબ્રુઆરીમાં યોજાનારી શાસક 'વર્કર્સ પાર્ટી કોંગ્રેસ' પહેલા કિમ જોંગ ઉન પોતાની સૈન્ય શક્તિનું પ્રદર્શન કરીને દેશભક્તિની લહેર ઊભી કરવા માંગે છે. ઉત્તર કોરિયાએ અગાઉ હાઇપરસોનિક અને વ્યૂહાત્મક ક્રુઝ મિસાઇલોના સફળ પરીક્ષણો કર્યા છે, જે પરમાણુ હુમલો કરવાની ક્ષમતા ધરાવે છે. સમુદ્રમાં છોડવામાં આવેલી આ લેટેસ્ટ મિસાઇલની રેન્જ અને પ્રકાર વિશે હજુ ગુપ્તતા જાળવવામાં આવી છે, જેનાથી અમેરિકા અને જાપાનની ચિંતામાં પણ વધારો થયો છે.

ઉત્તર કોરિયાની આ ઉશ્કેરણીજનક કાર્યવાહીથી દક્ષિણ કોરિયામાં તણાવ એટલી હદે વધી ગયો છે કે સરહદી વિસ્તારોમાં રહેતા નાગરિકોને સાવચેત રહેવા સૂચના અપાઈ છે. ઉત્તર કોરિયાએ તાજેતરમાં તેની પ્રથમ પરમાણુ સંચાલિત સબમરીનના નિર્માણની તસવીરો પણ જાહેર કરી હતી, જે સૂચવે છે કે તે લાંબા ગાળાના યુદ્ધની તૈયારી કરી રહ્યું છે. દક્ષિણ કોરિયાની તપાસ એજન્સીઓ હવે એ પણ તપાસી રહી છે કે શું આ ડ્રોન કોઈ ખાનગી સંસ્થાઓ દ્વારા મોકલવામાં આવ્યા હતા. જોકે, કિમ જોંગ ઉનનું આક્રમક વલણ જોતા લાગે છે કે આવનારા દિવસોમાં કોરિયન સરહદ પર સૈન્ય અથડામણની શક્યતા નકારી શકાય તેમ નથી.