નવી દિલ્હી:ભારત અને 27 દેશોના યુરોપિયન યુનિયન (EU) વચ્ચે આજે વેપાર જગતનો સૌથી મોટો અને ઐતિહાસિક 'મુક્ત વેપાર કરાર' (FTA) સંપન્ન થયો છે. છેલ્લા 18 વર્ષની લાંબી રાહ બાદ આ સોદો ફાઈનલ થયો છે, જેનાથી ભારતની ઓટોમોબાઈલ માર્કેટમાં મોટો ભૂકંપ આવવાની શક્યતા છે. આ કરાર હેઠળ ભારતે યુરોપિયન દેશોને અગાઉના ક્વોટા કરતા છ ગણો મોટો ઓટો ક્વોટા ઓફર કર્યો છે, જેનો સીધો અર્થ એ છે કે હવે યુરોપમાં બનેલી લક્ઝરી કાર ભારતમાં ખૂબ જ સસ્તા ભાવે ઉપલબ્ધ થશે.
આ ઐતિહાસિક સોદા મુજબ, યુરોપમાં બનેલા અંદાજે 2.50 લાખ વાહનોને ભારતીય બજારમાં પ્રવેશવાની મંજૂરી આપવામાં આવશે. અત્યારે વિદેશથી આયાત થતી કાર પર ભારતમાં 110% સુધીની આયાત જકાત (Import Duty) વસૂલવામાં આવે છે, જે હવે આગામી પાંચ વર્ષમાં તબક્કાવાર રીતે ઘટાડીને માત્ર 10% થી 35% સુધી લાવવામાં આવશે. આનાથી મર્સિડીઝ-બેન્ઝ, ફોક્સવેગન, રેનો અને સ્ટેલાન્ટિસ જેવી દિગ્ગજ કંપનીઓની કારની કિંમતોમાં લાખો રૂપિયાનો ઘટાડો થઈ શકે છે.
વડાપ્રધાન નરેન્દ્ર મોદીએ આ અવસરે ખુશી વ્યક્ત કરતા જણાવ્યું હતું કે, "આ ભારતનો અત્યાર સુધીનો સૌથી મોટો મુક્ત વેપાર કરાર છે. આ કરાર માત્ર વેપાર પૂરતો મર્યાદિત નથી, પરંતુ તે સહિયારી સમૃદ્ધિ માટેનો નવો બ્લુપ્રિન્ટ છે." તેમણે ઉમેર્યું કે આ FTA દ્વારા ભારતીય ખેડૂતો અને નાના ઉદ્યોગો માટે યુરોપિયન બજારોના દ્વાર ખુલશે અને દેશમાં રોકાણનો નવો પ્રવાહ શરૂ થશે. ખાસ કરીને ઇલેક્ટ્રિક વાહનો (EV) ના ક્ષેત્રમાં પણ ભારત અને યુરોપ વચ્ચે નવી ભાગીદારી જોવા મળશે, જે વૈશ્વિક સપ્લાય ચેઇનને મજબૂત બનાવશે.
નિષ્ણાતોના મતે, આ સોદો ભારતની મધ્યમ અને લક્ઝરી વર્ગની કાર માર્કેટમાં 'ગેમ ચેન્જર' સાબિત થશે. લક્ઝરી કાર ઉત્પાદકોને ભારતના ઉભરતા બજારમાં મોટું પ્લેટફોર્મ મળશે, જ્યારે ભારતીય ગ્રાહકોને વિશ્વ કક્ષાની ટેકનોલોજી ધરાવતી કાર સસ્તા દરે ખરીદવાની તક મળશે.