નવી દિલ્હી:કેન્દ્રીય બજેટ 2026 ના કાઉન્ટડાઉન વચ્ચે સોનાના રોકાણકારોમાં ભારે ઉત્તેજના અને અપેક્ષાઓ જોવા મળી રહી છે. હાલમાં સોનાના ભાવ રેકોર્ડ સ્તરે પહોંચીને ₹1.62 લાખ પ્રતિ 10 ગ્રામ (1 તોલા) ના આંકને વટાવી ગયા છે, જેના કારણે સામાન્ય મધ્યમ વર્ગ માટે ભૌતિક સોનું ખરીદવું હવે એક પડકાર બની ગયું છે. આ સંજોગોમાં, નિષ્ણાતો માને છે કે નિર્મલા સીતારમણ સોના પરની આયાત જકાત (Import Duty) ઘટાડવાની સાથે ડિજિટલ રોકાણને પ્રોત્સાહન આપવા માટે મોટી જાહેરાત કરી શકે છે.
રોકાણકારોની સૌથી મોટી માંગ સોવરિન ગોલ્ડ બોન્ડ (SGB) યોજનાને ફરીથી સક્રિય કરવાની છે. છેલ્લા કેટલાક સમયથી નવા બોન્ડ બહાર પાડવામાં આવ્યા નથી, જેના કારણે રોકાણકારો પાસે સરકારી ગેરંટી ધરાવતા સુરક્ષિત વિકલ્પોની અછત વર્તાઈ રહી છે. બજેટમાં ડિજિટલ ગોલ્ડ માટે નવા અને પારદર્શક નિયમો જાહેર થાય તેવી પ્રબળ શક્યતા છે, જેથી લોકો લોકરમાં સોનું રાખવાને બદલે તેને અર્થતંત્રમાં ઉત્પાદક રીતે રોકાણ કરી શકે.
ભારત દુનિયાના સૌથી મોટા ગોલ્ડ કન્ઝ્યુમર્સમાંનું એક છે, પરંતુ હજુ પણ મોટાભાગનું સોનું ઘરના લોકરમાં જ પડેલું રહે છે. સરકારનું લક્ષ્ય 'વિકસિત ભારત 2047' હેઠળ આ 'નિષ્ક્રિય સંપત્તિ'ને ડિજિટલ ઇકોનોમીમાં લાવવાનું છે. ઉદ્યોગ જગતની અપેક્ષા છે કે બજેટમાં ગોલ્ડ ETF અને ડિજિટલ ગોલ્ડ પર ટેક્સના નિયમો સરળ બનાવવામાં આવશે. જો સરકાર કસ્ટમ ડ્યુટીમાં ઘટાડો કરે છે, તો સોનાના ભાવમાં મોટો ઘટાડો જોવા મળી શકે છે, જે લગ્નની સિઝન વચ્ચે ગ્રાહકો માટે ‘રાહત પેકેજ’ સાબિત થશે.