વર્જિનિયા : વિશ્વની અગ્રણી એરલાઇન્સમાંની એક એવી અમેરિકન એરલાઇન્સ (American Airlines) અત્યારે કુદરતી આફત અને આર્થિક તેજીના બે વિરોધાભાસી મોરચા પર લડી રહી છે. અમેરિકામાં ચાલી રહેલા ભીષણ શિયાળાના તોફાને એરલાઇન્સના ઈતિહાસમાં સૌથી મોટો વિક્ષેપ પાડ્યો છે, જેના કારણે કંપનીને આશરે 150 મિલિયનથી 200 મિલિયન ડોલર (અંદાજે ₹1,200 થી ₹1,600 કરોડથી વધુ) નું મોટું નુકસાન થવાની ભીતિ છે.
કંપનીના સત્તાવાર નિવેદન અનુસાર, બરફના તોફાનને કારણે અત્યાર સુધીમાં 9,000 થી વધુ ફ્લાઇટ્સ રદ કરવી પડી છે. આને અમેરિકન એરલાઇન્સના ઈતિહાસમાં હવામાન સંબંધિત કામગીરીમાં આવેલો સૌથી મોટો અવરોધ ગણવામાં આવી રહ્યો છે. જોકે, આ આંચકા છતાં શેરબજારમાં કંપનીના શેરના ભાવમાં 3% થી વધુનો ઉછાળો જોવા મળ્યો છે, જેનું મુખ્ય કારણ કંપની દ્વારા વર્ષ 2026 માટે કરવામાં આવેલી નફાની આશાવાદી આગાહી છે.
પ્રીમિયમ અને કોર્પોરેટ મુસાફરીનો સહારો
એરલાઇન્સે જણાવ્યું છે કે ભલે સામાન્ય મુસાફરો બજેટમાં કાપ મૂકી રહ્યા હોય, પરંતુ ધનિક ગ્રાહકો પ્રીમિયમ અને ઉચ્ચ-માર્જિન સેવાઓ માટે વધુ ખર્ચ કરવા તૈયાર છે. આ ઉપરાંત, લાંબા સમય બાદ કોર્પોરેટ (બિઝનેસ) ટ્રાવેલમાં પણ મોટી રિકવરી જોવા મળી છે. આ મજબૂત માંગને જોતા કંપનીએ 2026 માં પ્રતિ શેર $1.70 થી $2.70 ના નફાનો અંદાજ લગાવ્યો છે, જે બજારના નિષ્ણાતોની અપેક્ષા કરતા ઘણો વધારે છે.
ઉલ્લેખનીય છે કે, ગત વર્ષના છેલ્લા ક્વાર્ટરમાં યુએસ સરકારના શટડાઉનને કારણે પણ એરલાઇન્સને $325 મિલિયનનો ફટકો પડ્યો હતો. પરંતુ હવે કંપની પ્રીમિયમ અપગ્રેડ અને હાઈ-એન્ડ ટ્રાવેલ પર ધ્યાન કેન્દ્રિત કરીને ડેલ્ટા અને યુનાઈટેડ જેવી હરીફ કંપનીઓને ટક્કર આપવા સજ્જ થઈ છે. તોફાન બાદ આસમાને પહોંચેલી રદ થયેલી ફ્લાઇટ્સની સંખ્યા વચ્ચે પણ અમેરિકન એરલાઇન્સના આ આશાવાદી વલણે રોકાણકારોમાં નવો વિશ્વાસ જગાડ્યો છે.