છેલ્લા 8 દિવસમાં સૌથી લોકપ્રિય કેનેડામાં બદલાયો વધુ એક નિયમ 8:11 PM
તા. ૧૫ ડિસેમ્બર ર૦ર૪ વિક્રમ સંવત ર૦૮૧ માગશર સુદ – ૧૫ રવિવાર
પ્લેન ક્રેશમાં અજીત પવારનું નિધન
શરદ પવારના ભત્રીજા તથા મહારાષ્ટ્રના રાજકરણમાં મોટુ નામ ધરાવતા અને છ વખત રાજયના નાયબ મુખ્યમંત્રી રહેલા અજીત પવારનું વિમાન સવારે બારામતી પાસે તુટી પડયું : વિમાન તુટી પડતા કુલ પાંચ લોકોના મોતઃ અજીત પવાર ૬૬ વર્ષના હતાં મહારાષ્ટ્રમાં શોકનું મોજું: ૩ દિવસનો રાજકીય શોકઃ અકસ્માતની ઘટનાની તપાસ થશેઃ ૬ વખત ડે.સીએમ બન્યા પણ સીએમ બની ન શકયાઃ તેઓ જનતાના નેતા હતાં: વડાપ્રધાન
મુંબઇ તા.૨૮: મહારાષ્ટ્રના નાયબ મુખ્યમંત્રી અજિત પવારનું અવસાન થયું છે. બુધવારે સવારે ૮:૪૫ વાગ્યે બારામતી એરપોર્ટ પર ઉતરતી વખતે તેમનું ચાર્ટર્ડ વિમાન ક્રેશ થયું હતું. તેઓ ૬૬ વર્ષના હતા. આ અકસ્માતમાં પવારના સુરક્ષા ગાર્ડ, બે પાઇલટ અને એક મહિલા ક્રૂ મેમ્બર સહિત પાંચ લોકોના મોત થયા હતા.
પવાર મહારાષ્ટ્ર પંચાયત ચૂંટણી માટે જાહેર સભાને સંબોધવા માટે બારામતી જઈ રહ્યા હતા. તેઓ સવારે ૮:૧૦ વાગ્યે મુંબઈથી રવાના થયા હતા. મહારાષ્ટ્ર ઉડ્ડયન વિભાગના જણાવ્યા અનુસાર, પાયલોટે સવારે ૮:૪૫ વાગ્યે બારામતી એરપોર્ટ પર ઉતરવાનો પ્રયાસ કર્યો હતો, પરંતુ રનવે સ્પષ્ટ દેખાતો ન હોવાથી તેમણે વિમાનને પાછું ઉપર લઈ લીધું હતું.
પહેલો પ્રયાસ નિષ્ફળ ગયા પછી, બારામતીના રનવે ૧૧ પર ઉતરવાનો બીજો પ્રયાસ કરવામાં આવ્યો. આ દરમિયાન, વિમાન રનવે પરથી લપસી ગયું અને ક્રેશ થયું. તે પછી તરત જ તેમાં આગ લાગી ગઈ. એવું જાણવા મળ્યું છે કે પાયલોટે લેન્ડિંગ દરમિયાન કોઈ કટોકટી સંકેતો આપ્યા ન હતા. તેમણે મેડે કોલ પણ કર્યો ન હતો.
મહારાષ્ટ્રના મુખ્યમંત્રી દેવેન્દ્ર ફડણવીસ મુંબઈથી બારામતી જવા રવાના થયા છે. તેમણે આજે શાળામાં રજા અને ત્રણ દિવસનો રાજ્ય શોક જાહેર કર્યો છે. પવારના અંતિમ સંસ્કાર બારામતીમાં થાય તેવી શક્યતા છે. અજિતના કાકા શરદ પવાર બારામતી હોસ્પિટલ પહોંચ્યા છે, જ્યાં તમામ મૃતદેહો લાવવામાં આવ્યા છે.
અજિત પવારના પાર્થિવ શરીરને બારામતી હોસ્પિટલ લાવવામાં આવ્યા બાદ મોટી ભીડ એકઠી થઈ ગઈ હતી. મહારાષ્ટ્રના નાયબ મુખ્યમંત્રી એકનાથ શિદેએ બુધવારે તેમના સાથી, નાયબ મુખ્યમંત્રી અજિત પવારના મૃત્યુને દુઃખદ અને દુર્ભાગ્યપૂર્ણ ગણાવ્યું હતું. તેમણે કહ્યું હતું કે તેમના જીવનનો ભોગ લેનાર વિમાન દુર્ઘટનાની તપાસ કરવામાં આવશે.
અજિત પવાર છ વખત નાયબ મુખ્યમંત્રી રહ્યા, પરંતુ ક્યારેય મુખ્યમંત્રી બન્યા નહીં
૨૨ જુલાઈ, ૧૯૫૯ના રોજ આશા અને અનંતરાવ પવારના ઘરે જન્મેલા અજિત પવાર ૧૯૮૨માં રાજકારણમાં પ્રવેશ્યા, તેમના કાકા (તેમના પિતાના નાના ભાઈ) શરદ પવારના પગલે ચાલતા, જ્યારે તેઓ ખાંડ મિલના બોર્ડમાં ચૂંટાયા.
મહારાષ્ટ્રના રેકોર્ડ છ ટર્મ માટે નાયબ મુખ્યમંત્રી તરીકે સેવા આપી ચૂકેલા અજિત પવાર ક્યારેય મુખ્યમંત્રી બન્યા નહીં. એક અનુભવી રાજકારણી, અજિત પવારે રાજ્યના મુખ્યમંત્રી બનવાની તેમની ઇચ્છા ક્યારેય છુપાવી નથી. જુલાઈ ૨૦૨૩માં ભાજપ અને શિવસેના ગઠબંધન સરકારમાં જોડાતા પહેલા, તેમણે નવેમ્બર ૨૦૧૯માં નાયબ મુખ્યમંત્રી તરીકે સેવા આપી હતી જ્યારે દેવેન્દ્ર ફડણવીસ મુખ્યમંત્રી હતા, પરંતુ તેમની સરકાર માંડ બે દિવસ ચાલી હતી.
અજિત પવાર વર્તમાન સરકારમાં નાણા અને આયોજન મંત્રી હતા. આવતા મહિને ૨૩ ફેબ્રુઆરીએ મુંબઈમાં રાજ્ય વિધાનસભાના બજેટ સત્ર દરમિયાન તેઓ ૨૦૨૬-૨૭નું બજેટ રજૂ કરવાના હતા.
અકસ્માતમાં માર્યા ગયેલા પાંચ લોકોના નામ છેઃ
અજીત પવાર - નાયબ મુખ્યમંત્રી
હાઈકોર્ટ વિદીપ જાધવ, અજિતના અંગત સુરક્ષા અધિકારી
કેપ્ટન સુમિત કપૂર - પાયલટ
કેપ્ટન શામ્ભવી પાઠક - પાયલટ
પિકી માલી - ફલાઇટ એટેન્ડન્ટ
નાયબ મુખ્યમંત્રી અજિત પવારના અવસાન બાદ, મહારાષ્ટ્ર સરકારના તમામ કાર્યક્રમો રદ કરવામાં આવ્યા છે. એકનાથ શિદે બારામતી આવી રહ્યા છે. અજિત પવારના અવસાનના શોકમાં બારામતીમાં બંધનું એલાન કરવામાં આવ્યું છે.
દરમિયાન, એરક્રાફટ ઇન્વેસ્ટિગેશન બ્યુરો (AAIB) એ અકસ્માતની તપાસ શરૂ કરી દીધી છે. તપાસ એજન્સીની એક ટીમ દિલ્હીમાં વિમાનના સંચાલક, સ્લ્ય્ વેન્ચર્સની ઓફિસ પહોંચી ગઈ છે. બીજી ટીમ બારામતી માટે રવાના થઈ ગઈ છે.
દરમિયાન, VSR વેન્ચર્સે જણાવ્યું છે કે પાઇલટને ૧૬,૦૦૦ કલાક ઉડાનનો અનુભવ હતો, જ્યારે કો-પાઇલટને ૧,૫૦૦ કલાકનો અનુભવ હતો. કંપનીએ દાવો કર્યો હતો કે વિમાનમાં કોઈ ટેકનિકલ ખામી નહોતી.
મુંબઈમાં એક પત્રકાર પરિષદને સંબોધતા મુખ્યમંત્રી દેવેન્દ્ર ફડણવીસે જણાવ્યું હતું કે બુધવારે રાજ્યમાં શાળાઓ અને કોલેજો સહિત તમામ સંસ્થાઓમાં રજા જાહેર કરવામાં આવી છે. ત્રણ દિવસનો રાજ્ય શોક પણ જાહેર કરવામાં આવ્યો છે. પવારના અંતિમ સંસ્કાર અંગેનો નિર્ણય તેમના પરિવાર સાથે પરામર્શ કર્યા પછી લેવામાં આવશે.(૩૮.૪૦)
(2:59 PM IST)
