દુબઈ તા.૨૮: પરંપરાગત રીતે સોનાને હંમેશા તિજોરી કે લોકરમાં સાચવી રાખવાની વસ્‍તુ માનવામાં આવે છે, પરંતુ દુબઈના અગ્રણી પ્‍લેટફોર્મ   O Gold એ આ માન્‍યતાને સંપૂર્ણપણે બદલી નાખી છે. કંપનીએ પોતાને એક લાઇફસ્‍ટાઇલ સુપર એપ તરીકે રિબ્રાન્‍ડ કરી છે, જે રોકાણકારોને તેમના ડિજિટલ ગોલ્‍ડનો ઉપયોગ રોજિદા વ્‍યવહારોમાં કરવાની છૂટ આપે છે. આ એક એવી વ્‍યવસ્‍થા છે જ્‍યાં ટેકનોલોજી અને પરંપરાગત સંપત્તિનો અદભૂત સમન્‍વય જોવા મળે છે. હવે દુબઈમાં સોનું માત્ર રોકાણનું સાધન નહીં, પણ ખિસ્‍સામાં રહેલા રોકડ નાણાંની જેમ જ કામ કરશે.

O Gold એ માસ્‍ટરકાર્ડ અને મવારિદ ફાઇનાન્‍સ સાથે મળીને એક ખાસ પેમેન્‍ટ કાર્ડ લોન્‍ચ કર્યું છે. આ કાર્ડની સૌથી મોટી વિશેષતા એ છે કે જ્‍યારે તમે કોફી શોપમાં બિલ ચૂકવો કે સુપરમાર્કેટમાં ગ્રોસરી ખરીદો, ત્‍યારે તમારા વોલેટમાં પડેલા સોનાના બેલેન્‍સમાંથી સીધું જ પેમેન્‍ટ થઈ જશે. અત્‍યાર સુધી સોનાને રોકડમાં ફેરવવા માટે તેને વેચવાની જરૂર પડતી હતી, પરંતુ આ સુવિધાને કારણે હવે સોનું એક લિક્‍વિડ કરન્‍સી બની જશે. આ સમગ્ર સિસ્‍ટમ શરિયા-કમ્‍પ્‍લાયન્‍ટ (ઇસ્‍લામિક કાયદા મુજબ) અને સુરક્ષિત છે, જે તેને ખાડી દેશોમાં વધુ લોકપ્રિય બનાવે છે.

આ સુપર એપ માત્ર પેમેન્‍ટ સુધી મર્યાદિત નથી, પણ વપરાશકર્તાઓને પ્રીમિયમ અનુભવ પણ પૂરો પાડે છે. કાર્ડ ધારકોને એરપોર્ટ પર લક્‍ઝરી લાઉન્‍જ એક્‍સેસ, આંતરરાષ્ટ્રીય હોટલોમાં ડિસ્‍કાઉન્‍ટ અને મોટી બ્રાન્‍ડ્‍સ પર સ્‍પેશિયલ ઓફર્સ જેવી સુવિધાઓ મળશે. આ સિવાય, એપ દ્વારા યુઝર્સ ૮,૦૦૦ થી વધુ ગ્‍લોબલ બ્રાન્‍ડ્‍સના ગિફટ કાર્ડ્‍સ ખરીદી શકે છે અને ટ્રાવેલિગ દરમિયાન ઇ-સિમ (eSIM) જેવી આધુનિક સુવિધાઓનો પણ લાભ લઈ શકે છે. આમ, તે રોકાણની સાથે સાથે પ્રવાસ અને શોપિંગ માટેનું વન-સ્‍ટોપ સોલ્‍યુશન બની ગયું છે.

ઘણાને પ્રશ્ન થાય કે ડિજિટલ ગોલ્‍ડ કેટલું સુરક્ષિત છે? O Gold પ્‍લેટફોર્મ પર તમે જે સોનું ખરીદો છો, તેટલું જ ફિઝિકલ સોનું UAE ના હાઈ-સિક્‍યોરિટી વોલ્‍ટ્‍સમાં વીમા સાથે સુરક્ષિત રાખવામાં આવે છે. કંપનીના ફાઉન્‍ડર બંદર અલ-ઓથમાનના મતે, તેમનું લક્ષ્ય સોનાને માત્ર સેવિંગ ની વસ્‍તુ મટાડીને સ્‍પેન્‍ડિંગ એટલે કે વાપરવાની વસ્‍તુ બનાવવાનું છે. આ મોડેલ ફિન્‍ટેક (FinTech) ક્ષેત્રે એક મોટી ક્રાંતિ માનવામાં આવે છે, કારણ કે તે મોંઘવારી સામે રક્ષણ આપતી સંપત્તિને સીધી જ અર્થતંત્રના વ્‍યવહારો સાથે જોડે છે.