વિશાખાપટ્ટનમ, તા. 28 : ભારતના સંરક્ષણ ક્ષેત્રની ગુપ્ત માહિતી મેળવવા માટે પાકિસ્તાન દ્વારા રચવામાં આવેલા જાસૂસી કાવતરાના કેસમાં વિશાખાપટ્ટનમની વિશેષ NIA અદાલતે આજે એક મહત્વનો ચુકાદો આપ્યો છે. આ કાવતરાના મુખ્ય સૂત્રધાર અલ્તાફહુસેન ઘાંચીભાઈ ઉર્ફે શકીલને અદાલતે સાડા પાંચ વર્ષની કેદ અને દંડની સજા ફટકારી છે.
કેવી રીતે ચાલતું હતું જાસૂસીનું જાળ?
આ આખો મામલો ત્યારે સામે આવ્યો જ્યારે તપાસમાં જાણવા મળ્યું કે પાકિસ્તાની નૌકાદળ દ્વારા ધરપકડ કરાયેલા ભારતીય માછીમારોના મોબાઈલ ફોન અને સિમ કાર્ડ જપ્ત કરવામાં આવ્યા હતા. આ સિમ કાર્ડનો દુરુપયોગ કરી પાકિસ્તાની ઇન્ટેલિજન્સ ઓપરેટિવ્સ (PIOs) ભારતમાં જાસૂસી પ્રવૃત્તિઓ ચલાવી રહ્યા હતા. આરોપી અલ્તાફહુસેન આ સિમ કાર્ડ્સ દ્વારા OTP જનરેટ કરી પાકિસ્તાની એજન્ટોને મોકલતો હતો, જેના કારણે તેઓ પાકિસ્તાનમાં બેઠા બેઠા ભારતીય વૉટ્સએપ નંબરો ઓપરેટ કરી શકતા હતા.
સંરક્ષણ કર્મચારીઓને બનાવતા હતા નિશાન
આ છેતરપિંડીથી મેળવેલા ભારતીય નંબરોનો ઉપયોગ કરીને પાકિસ્તાની એજન્ટો ભારતીય સંરક્ષણ સંસ્થાઓના કર્મચારીઓનો સંપર્ક કરતા હતા. તેમનો હેતુ સૈન્ય સંબંધિત સંવેદનશીલ અને પ્રતિબંધિત માહિતી મેળવવાનો હતો, જે ભારતની એકતા, સુરક્ષા અને સાર્વભૌમત્વ માટે મોટું જોખમ ઊભું કરી શકે તેમ હતું.
NIA કોર્ટે ફટકારી સજા
NIA દ્વારા રજૂ કરવામાં આવેલા 37 સાક્ષીઓ અને પુરાવાઓ બાદ, આરોપીએ ટ્રાયલ દરમિયાન પોતાનો ગુનો કબૂલ કર્યો હતો. અદાલતે તેને ગેરકાયદેસર પ્રવૃત્તિઓ (નિવારણ) અધિનિયમ (UAPA) અને આઈટી એક્ટ હેઠળ દોષિત ઠેરવીને સાડા પાંચ વર્ષની કેદ અને 10,000 રૂપિયાનો કુલ દંડ ફટકાર્યો છે.
આ ચુકાદો એવા સમયે આવ્યો છે જ્યારે દેશમાં સાયબર સુરક્ષા અને હની-ટ્રેપ જેવી ઘટનાઓ સામે સરકાર લાલ આંખ કરી રહી છે.