બેંગલુરુ:  ભારતીય આકાશમાં અત્યાર સુધી અમેરિકન બોઇંગ અને યુરોપિયન એરબસના વિમાનોનું વર્ચસ્વ રહ્યું છે, પરંતુ હવે આ દ્રશ્ય બદલાવા જઈ રહ્યું છે. ફાઇટર જેટ ક્ષેત્રે પોતાની ધાક જમાવનાર હિન્દુસ્તાન એરોનોટિક્સ લિમિટેડ (HAL) એ રશિયાની યુનાઇટેડ એરક્રાફ્ટ કોર્પોરેશન (UAC) સાથે 'સુખોઈ સુપરજેટ-100' (SSJ-100) ના ઉત્પાદન માટે ઐતિહાસિક કરાર કર્યા છે. આ કરાર હેઠળ ભારતને માત્ર વિમાન બનાવવાનું લાઇસન્સ જ નહીં, પરંતુ વેચાણ અને જાળવણીની સંપૂર્ણ જવાબદારી પણ મળશે. આ વિમાનની ખાસિયત એ છે કે તે સુખોઈ ફાઇટર જેટની ડિઝાઈન પરથી પ્રેરિત છે, જે તેને અત્યંત મજબૂત અને ઝડપી બનાવે છે.

આ વિમાનને "ટૂંકા રનવેનો બાહુબલી" કહેવામાં આવે છે કારણ કે તે શિમલા, કુલ્લુ અને ઉત્તર-પૂર્વના પહાડી વિસ્તારો જેવા દુર્ગમ એરપોર્ટ્સ પર પણ આસાનીથી લેન્ડિંગ કરી શકે છે, જ્યાં મોટા વિમાનો ઉતરી શકતા નથી. 870 કિમી પ્રતિ કલાકની ઝડપે ઉડતું આ 100-સીટર જેટ ભારતની પ્રાદેશિક કનેક્ટિવિટીને નવી ઊંચાઈએ લઈ જશે. તેમાં મુસાફરો માટે વધારાની જગ્યા અને 18.3 ઇંચ પહોળી બેઠકોની સુવિધા હશે, જે નાના વિમાનોમાં અવારનવાર અનુભવાતી જગ્યાની તંગીને દૂર કરશે. આધુનિક એવિઓનિક્સને કારણે તે ગાઢ ધુમ્મસમાં પણ સુરક્ષિત મુસાફરીની ખાતરી આપે છે.

આ પ્રોજેક્ટ ભારતને નાગરિક ઉડ્ડયન ઉત્પાદનના વૈશ્વિક નકશા પર સ્થાપિત કરશે. ભારતમાં ઉત્પાદન થવાને કારણે આ વિમાનોની કિંમત ઘટશે, જેનો સીધો ફાયદો સામાન્ય મુસાફરોને 'સસ્તી હવાઈ મુસાફરી' તરીકે મળશે. આ કરાર ટેકનોલોજીના હસ્તાંતરણ માટે પણ મહત્વનો છે, કારણ કે તે ભારતને વિમાન ઉત્પાદન ક્ષેત્રે 'આત્મનિર્ભર' બનાવશે. ટૂંક સમયમાં જ એવો દિવસ આવશે જ્યારે તમે એરપોર્ટ પર ઉભા હશો અને વિમાનના દરવાજા પર ગર્વથી 'મેડ ઇન ઇન્ડિયા' લખેલું જોવા મળશે, જે દરેક ભારતીય માટે ગૌરવની ક્ષણ હશે.