જયપુર : રાજસ્થાન વિધાનસભાના બજેટ સત્રનો પ્રારંભ મંગળવારે કોઈ ફિલ્મી દ્રશ્ય જેવો રહ્યો હતો. ગૃહની કાર્યવાહી શરૂ થાય તે પહેલાં જ વિધાનસભાના મુખ્ય દ્વાર પર રાજકીય ગરમાવો જોવા મળ્યો હતો. વિપક્ષી પાર્ટી કોંગ્રેસ અને અપક્ષ ધારાસભ્યોએ સરકારને ઘેરવા માટે જે અનોખા અંદાજ અપનાવ્યા, તેના કારણે આખું પરિસર આશ્ચર્યચકિત થઈ ગયું હતું.
ખેતમજૂર બનીને આવ્યા કોંગ્રેસી નેતાઓ
વિરોધ પક્ષના નેતા ટીકારામ જુલી અને પ્રદેશ કોંગ્રેસ પ્રમુખ ગોવિંદ સિંહ દોતાસરાના નેતૃત્વમાં કોંગ્રેસના ધારાસભ્યો હાથમાં પાવડા, ટોપલીઓ અને છરા લઈને વિધાનસભા પહોંચ્યા હતા. મનરેગા યોજનામાં કેન્દ્ર સરકાર દ્વારા કરવામાં આવી રહેલા કથિત ફેરફારોના વિરોધમાં કોંગ્રેસે આ અનોખી રીત અપનાવી હતી. નેતાઓએ સૂત્રોચ્ચાર કરતા જણાવ્યું હતું કે, મનરેગા ગ્રામીણ અર્થતંત્રની કરોડરજ્જુ છે અને તેમાં કોઈપણ પ્રકારની છેડછાડ ગ્રામીણ જનતા સાથે અન્યાય સમાન છે.
ધારાસભ્યની 'સીબીઆઈ તપાસ' વાળી સાડી
બીજી તરફ, બાયનાના અપક્ષ મહિલા ધારાસભ્ય રીતુ બનાવત આખા સત્રના આકર્ષણનું કેન્દ્ર બન્યા હતા. ધારાસભ્ય ભંડોળને લઈને એક અખબાર દ્વારા કરવામાં આવેલા કથિત સ્ટિંગ ઓપરેશનનો વિરોધ કરવા તેઓ એવી સાડી પહેરીને આવ્યા હતા જેના પર "CBI તપાસની માંગણી" લખેલું હતું. તેમણે આક્ષેપ કર્યો હતો કે ધારાસભ્યોની છબી ખરડવાના પ્રયાસો થઈ રહ્યા છે અને સત્ય બહાર લાવવા માટે નિષ્પક્ષ તપાસ થવી જોઈએ.
રાજ્યપાલનું સંબોધન અને 'રાઇઝિંગ રાજસ્થાન'
વિરોધ વચ્ચે રાજ્યપાલ હરિભાઉ બાગડેએ ૧ કલાક અને ૨૧ મિનિટ સુધી ભાષણ આપ્યું હતું. તેમણે સરકારની સિદ્ધિઓ ગણાવતા કહ્યું કે, "રાઇઝિંગ રાજસ્થાન" હેઠળ ૩૫ લાખ કરોડના કરાર થયા છે અને ૧ લાખ નવી સરકારી ભરતીઓનું કેલેન્ડર ટૂંક સમયમાં જાહેર કરવામાં આવશે. રાજ્યપાલના સંબોધન બાદ વિધાનસભા અધ્યક્ષ વાસુદેવ દેવનાનીએ ગૃહને ગુરુવાર સુધી સ્થગિત કર્યું હતું. જોકે, પ્રથમ દિવસે જે માહોલ જોવા મળ્યો તે જોતા આગામી દિવસોમાં પણ વિધાનસભામાં ભારે હોબાળો થવાની પૂરેપૂરી શક્યતા છે.