કોલંબો : શ્રીલંકાના રાજકારણમાં ભ્રષ્ટાચાર અને સત્તાના દુરુપયોગના કેસમાં એક મોટો વળાંક આવ્યો છે. કોલંબો ફોર્ટ મેજિસ્ટ્રેટ કોર્ટે પૂર્વ રાષ્ટ્રપતિ રાનિલ વિક્રમસિંઘેના અંગત સચિવ સામન એકનાયકેને ૧૧ ફેબ્રુઆરી સુધી રિમાન્ડ પર મોકલવાનો સખત આદેશ આપ્યો છે. આ કેસ સરકારી તિજોરીના નાણાંનો અંગત મોજશોખ માટે ઉપયોગ કરવા સાથે જોડાયેલો છે, જેમાં વિક્રમસિંઘે પોતે પણ મુખ્ય આરોપી તરીકે તપાસનો સામનો કરી રહ્યા છે.
શું છે સમગ્ર વિવાદ?
આ વિવાદ ૨૦૨૩ના અંતમાં રાનિલ વિક્રમસિંઘેની લંડન યાત્રાથી શરૂ થયો હતો. આરોપ છે કે વિક્રમસિંઘેએ તેમની પત્ની પ્રોફેસર મૈત્રી વિક્રમસિંઘેના પદવીદાન સમારોહ (Convocation) માં હાજરી આપવા માટે સરકારી ભંડોળમાંથી આશરે ૧૬.૯ મિલિયન ડોલર (કરોડો રૂપિયા) ની ફાળવણી કરી હતી. જોકે આ પ્રવાસને સત્તાવાર મુલાકાત તરીકે દર્શાવવામાં આવ્યો હતો, પરંતુ તપાસમાં બહાર આવ્યું છે કે તેમાં જાહેર જનતાના ટેક્સના પૈસાનો વ્યક્તિગત હેતુ માટે ઉપયોગ થયો હતો.
ઇતિહાસમાં પ્રથમવાર પૂર્વ રાષ્ટ્રપતિની ધરપકડ
નોંધનીય છે કે, ઓગસ્ટ ૨૦૨૫માં આ જ કેસમાં રાનિલ વિક્રમસિંઘેની 'ક્રિમિનલ ઇન્વેસ્ટિગેશન ડિપાર્ટમેન્ટ' (CID) દ્વારા ધરપકડ કરવામાં આવી હતી. આ સાથે તેઓ શ્રીલંકાના ઇતિહાસમાં રિમાન્ડ કસ્ટડીમાં જનારા પ્રથમ ભૂતપૂર્વ રાષ્ટ્રપ્રમુખ બન્યા હતા. જોકે, બાદમાં તબીબી કારણોસર તેમને જામીન આપવામાં આવ્યા હતા. હવે તેમના ખાસ ગણાતા સચિવની ધરપકડથી વિક્રમસિંઘેની કાનૂની ઘેરાબંધી વધુ મજબૂત બની છે.
એટર્ની જનરલે કોર્ટને ખાતરી આપી છે કે આ મામલે તપાસ અંતિમ તબક્કામાં છે અને એક મહિનાની અંદર રિપોર્ટ સોંપવામાં આવશે. માર્ચ મહિનામાં આ કેસમાં ઔપચારિક રીતે આરોપો (Chargesheet) દાખલ કરવામાં આવે તેવી શક્યતા છે. શ્રીલંકાની જનતામાં આ કેસને લઈને ભારે આક્રોશ જોવા મળી રહ્યો છે, કારણ કે દેશ આર્થિક સંકટમાંથી પસાર થઈ રહ્યો છે ત્યારે સત્તાધીશો દ્વારા ભંડોળનો આવો દુરુપયોગ ચિંતાનો વિષય બન્યો છે.