નવી દિલ્હી : ભારતીય અર્થતંત્ર માટે વર્ષ ૨૦૨૬ની શરૂઆત શાનદાર સમાચાર સાથે થઈ છે. બુધવારે જાહેર થયેલા સરકારી આંકડાઓ મુજબ, ડિસેમ્બર ૨૦૨૫માં ભારતનો ઔદ્યોગિક ઉત્પાદન વૃદ્ધિ દર (IIP) ૭.૮ ટકા નોંધાયો છે, જે છેલ્લા બે વર્ષમાં સૌથી ઝડપી ગતિ દર્શાવે છે. મેન્યુફેક્ચરિંગ, માઈનિંગ અને પાવર સેક્ટરમાં અપેક્ષા કરતા વધુ સારા દેખાવને કારણે ઉદ્યોગ જગતમાં નવી ઉર્જા જોવા મળી રહી છે.
કયા ક્ષેત્રોમાં જોવા મળી બમ્પર વૃદ્ધિ?
નેશનલ સ્ટેટિસ્ટિક્સ ઓફિસ (NSO) ના રિપોર્ટ અનુસાર, મેન્યુફેક્ચરિંગ ક્ષેત્રે ૮.૧ ટકાનો પ્રભાવશાળી વિકાસ નોંધાયો છે. ખાસ કરીને કમ્પ્યુટર અને ઈલેક્ટ્રોનિક્સ ઉત્પાદનોમાં ૩૪.૯ ટકા અને મોટર વાહનોના ઉત્પાદનમાં ૩૩.૫ ટકા જેવો તોતિંગ વધારો જોવા મળ્યો છે. આ આંકડા સૂચવે છે કે ભારત હવે વૈશ્વિક સ્તરે મેન્યુફેક્ચરિંગ હબ બનવા તરફ ઝડપથી આગળ વધી રહ્યું છે. આ ઉપરાંત, ઈન્ફ્રાસ્ટ્રક્ચર અને બાંધકામ ક્ષેત્રની ચીજવસ્તુઓમાં પણ ૧૨.૧ ટકાનો વધારો થયો છે, જે દેશમાં ચાલી રહેલા વિકાસકાર્યોની ગતિ દર્શાવે છે.
ગ્રાહકોનો ઉત્સાહ અને રોકાણ વધ્યું
ઉપયોગ આધારિત વર્ગીકરણ જોઈએ તો, ગ્રાહક ટકાઉ વસ્તુઓ (Consumer Durables) જેવી કે ફ્રીજ, ટીવી અને એસીના ઉત્પાદનમાં ૧૨.૩ ટકાનો વધારો થયો છે. આનો અર્થ એ છે કે સામાન્ય જનતાની ખરીદશક્તિ વધી છે અને બજારમાં માગ મજબૂત છે. ફાર્માસ્યુટિકલ્સ અને મૂળભૂત ધાતુઓના ઉત્પાદનમાં પણ સકારાત્મક વલણ જોવા મળ્યું છે. ૨૩ માંથી ૧૬ ઉદ્યોગ જૂથોએ ગ્રીન સિગ્નલ બતાવતા અર્થશાસ્ત્રીઓ આ ડેટાને આગામી બજેટ અને આર્થિક નીતિઓ માટે ખૂબ જ હકારાત્મક માની રહ્યા છે.
ખાણકામ ક્ષેત્રે ૬.૮ ટકા અને વીજ ઉત્પાદનમાં ૬.૩ ટકાનો વધારો એ સાબિત કરે છે કે ઔદ્યોગિક એકમોમાં ઉર્જાની માગ વધી રહી છે, જે આર્થિક ગતિવિધિઓ તેજ હોવાનો સ્પષ્ટ સંકેત છે.