નવી દિલ્હી:  વૈશ્વિક આતંકવાદના નકશા પર એક અત્યંત ચિંતાજનક વળાંક આવ્યો છે, જે સીધો ભારતની સુરક્ષા સાથે જોડાયેલો છે. પાકિસ્તાન સ્થિત આતંકી સંગઠન લશ્કર-એ-તૈયબા (LeT) ના વરિષ્ઠ કમાન્ડર ફૈઝલ નદીમે જાહેરમાં સ્વીકાર્યું છે કે તે અને તેના સાથીઓ કતારની રાજધાની દોહામાં હમાસના ટોચના નેતા ખાલિદ મશાલને મળ્યા હતા. આ કબૂલાત માત્ર એક મુલાકાત નથી, પરંતુ બે મોટા આતંકવાદી નેટવર્ક વચ્ચે વધી રહેલા સંકલનનો પુરાવો છે. સૌથી ગંભીર વાત એ છે કે આ મુલાકાતમાં જમ્મુ-કાશ્મીરના પહેલગામ હુમલાનો માસ્ટરમાઇન્ડ સૈફુલ્લાહ કસુરી પણ હાજર હતો, જે સ્પષ્ટ કરે છે કે આ જોડાણનો ટાર્ગેટ ભારત હોઈ શકે છે.

ભારતીય ગુપ્તચર એજન્સીઓ આ ગઠબંધનને અત્યંત ગંભીરતાથી લઈ રહી છે. નિષ્ણાતોનું માનવું છે કે લશ્કર અને હમાસ વચ્ચેનો આ સંપર્ક માત્ર વૈચારિક નથી, પરંતુ ઓપરેશનલ અનુભવ, હથિયારોની ટેકનોલોજી અને લોજિસ્ટિક્સ શેર કરવા સુધી વિસ્તરેલો હોઈ શકે છે. અહેવાલ મુજબ, આ કબૂલાત સાબિત કરે છે કે પાકિસ્તાની આતંકી સંગઠનો હવે આંતરરાષ્ટ્રીય સ્તરે પોતાના સંપર્કો મજબૂત કરી રહ્યા છે. અગાઉ પણ હમાસના કમાન્ડરો પાકિસ્તાનની મુલાકાત લેતા અને લશ્કરના નેતાઓ સાથે સ્ટેજ શેર કરતા જોવા મળ્યા હતા, જે દર્શાવે છે કે તેઓ હવે પોતાના સંબંધો છુપાવવાની પણ તસ્દી લેતા નથી.

આંતરરાષ્ટ્રીય સ્તરે આ જોડાણ પાકિસ્તાન માટે નવી મુસીબત ઉભી કરી શકે છે. ભારત આ મુદ્દાને ફાઇનાન્શિયલ એક્શન ટાસ્ક ફોર્સ (FATF) અને સંયુક્ત રાષ્ટ્ર જેવા વૈશ્વિક મંચો પર ઉઠાવવાની તૈયારી કરી રહ્યું છે. અમેરિકા દ્વારા પ્રતિબંધિત બંને સંગઠનો વચ્ચેનો સહયોગ આંતરરાષ્ટ્રીય સુરક્ષા કાયદાઓનું સરેઆમ ઉલ્લંઘન છે. સુરક્ષા અધિકારીઓના મતે, હમાસના નેતા નાજી ઝહીરની વારંવારની પાકિસ્તાન મુલાકાતો અને લશ્કરના નેતાઓ સાથેની તેની નિકટતા સૂચવે છે કે ભારત વિરોધી પ્રવૃત્તિઓ માટે એક નવો 'ગ્લોબલ ફ્રન્ટ' તૈયાર થઈ રહ્યો છે, જેના પર ભારતની બાજ નજર છે.