અમદાવાદ : જ્યારે પણ વૈશ્વિક બજારમાં ચાંદીના ભાવ વધે છે, ત્યારે રોકાણકારોના મનમાં એક જ સવાલ ઉઠે છે કે આખરે આ કિંમતી ધાતુનો સૌથી મોટો ભંડાર કયા દેશ પાસે છે? IMF અને તાજેતરના અહેવાલો મુજબ, વિશ્વનો કુલ ચાંદીનો ભંડાર માત્ર ગણીગાંઠી દેશોની ધરતીમાં કેન્દ્રિત છે. આ યાદીમાં દક્ષિણ અમેરિકાનો દેશ પેરુ સૌથી મોખરે છે, જે વિશ્વના કુલ જથ્થાના લગભગ ચોથા ભાગ પર કબજો ધરાવે છે.
 અહેવાલ મુજબ, પેરુ પાસે અંદાજે ૧,૪૦,૦૦૦ મેટ્રિક ટન ચાંદીનો ભંડાર છે, જે વિશ્વના કુલ ભંડારના ૨૨% જેટલો થાય છે. સાદી ભાષામાં કહીએ તો, દુનિયાની દર ૧૦૦ ટન ચાંદીમાંથી ૨૨ ટન માત્ર પેરુમાં ભૂગર્ભમાં છે. પેરુની સાથે ચિલી અને બોલિવિયા જેવા દેશોને ઉમેરવામાં આવે, તો એકલું દક્ષિણ અમેરિકા વિશ્વના ૩૦% ચાંદીના ભંડારને નિયંત્રિત કરે છે.
 પેરુ પછી ઓસ્ટ્રેલિયા (૯૪,૦૦૦ ટન) અને રશિયા (૯૨,૦૦૦ ટન) અનુક્રમે ૧૫% અને ૧૪% હિસ્સા સાથે બીજા અને ત્રીજા નંબરે છે. ચીન પાસે ૧૧% (૭૦,૦૦૦ ટન) અને પોલેન્ડ પાસે ૧૦% (૬૧,૦૦૦ ટન) ભંડાર છે. નવાઈની વાત એ છે કે, મેક્સિકો વિશ્વમાં ચાંદીનું સૌથી વધુ 'ઉત્પાદન' કરતો દેશ હોવા છતાં, 'ભંડાર' (Reserve) ની બાબતમાં તે ૩૭,૦૦૦ ટન સાથે પાછળ છે. આનો અર્થ એ કે મેક્સિકોમાં ચાંદી ઝડપથી કાઢવામાં આવી રહી છે, પરંતુ તેનો સંગ્રહ પેરુ જેટલો ઊંડો નથી.
 ભારતીયો માટે ચાંદીનું ધાર્મિક અને સામાજિક મહત્વ ખૂબ ઊંચું છે, પરંતુ જ્યારે વાત ધરતીના પેટાળમાં રહેલા ભંડારની આવે છે, ત્યારે આંકડા નિરાશાજનક છે. ભારત પાસે માત્ર ૮,૦૦૦ ટન ચાંદીનો ભંડાર છે, જે વિશ્વના કુલ જથ્થાના માંડ ૧% જેટલો છે. આ જ કારણ છે કે ભારતે પોતાની વિશાળ માંગને પહોંચી વળવા માટે વિદેશોથી થતી આયાત પર નિર્ભર રહેવું પડે છે. ભવિષ્યમાં ઇલેક્ટ્રિક વાહનો અને સોલર પેનલ્સમાં ચાંદીનો વપરાશ વધતા, પેરુ અને ઓસ્ટ્રેલિયા જેવા દેશો વૈશ્વિક અર્થતંત્રમાં અત્યંત નિર્ણાયક ભૂમિકા ભજવશે.