આઈઝોલ, તા.28 : મિઝોરમ સરકારે રાજ્યની શિક્ષણ વ્યવસ્થામાં એક ઐતિહાસિક પરિવર્તન લાવવાનો નિર્ણય કર્યો છે. વર્ષ 2027-28 થી મિઝોરમમાં શાળાનું શૈક્ષણિક કેલેન્ડર બદલાઈ જશે. અત્યાર સુધી અમલમાં રહેલા એપ્રિલ-માર્ચના ચક્રને સ્થાને હવે શાળાઓ જાન્યુઆરી-ડિસેમ્બરના શૈક્ષણિક વર્ષ મુજબ ચાલશે. આ નિર્ણયને કારણે વિદ્યાર્થીઓ અને વાલીઓએ હવે નવા વર્ષની શરૂઆત સાથે જ નવા ધોરણમાં પ્રવેશ મેળવવાની તૈયારીઓ કરવી પડશે.
માત્ર પ્રાથમિક અને ઉચ્ચ શાળા માટે લાગુ
મિઝોરમના શિક્ષણ મંત્રી ડૉ. વનલથલાનાએ આ અંગે વિગતો આપતા જણાવ્યું હતું કે, જાન્યુઆરીથી ડિસેમ્બર સુધીનું આ નવું શૈક્ષણિક કેલેન્ડર માત્ર પ્રાથમિકથી લઈને ઉચ્ચ શાળા (High School) વિભાગના વિદ્યાર્થીઓ માટે જ અમલમાં આવશે. આ ફેરફાર પાછળનો હેતુ શૈક્ષણિક વ્યવસ્થાને વધુ સુસંગત બનાવવાનો છે. જોકે, હાયર સેકન્ડરી એટલે કે ધોરણ 11 અને 12 ના વિદ્યાર્થીઓ માટે હાલનું એપ્રિલ-માર્ચનું કેલેન્ડર જ યથાવત રાખવામાં આવશે.
બોર્ડની પરીક્ષાઓ પર શું અસર થશે?
વિદ્યાર્થીઓમાં સૌથી મોટી મૂંઝવણ ધોરણ 10 ની બોર્ડ પરીક્ષાઓને લઈને હતી, પરંતુ શિક્ષણ મંત્રીએ સ્પષ્ટતા કરી છે કે ધોરણ 10 ની બોર્ડની પરીક્ષાઓના સમયપત્રકમાં કોઈ ફેરફાર કરવામાં આવ્યો નથી. બોર્ડની પરીક્ષાઓ તેના નિર્ધારિત સમયે એટલે કે ફેબ્રુઆરી-માર્ચ દરમિયાન જ લેવામાં આવશે. 2027 થી અમલમાં આવનારા આ નિર્ણયને પગલે રાજ્યનું શિક્ષણ વિભાગ અત્યારથી જ જરૂરી તૈયારીઓમાં લાગી ગયું છે.