અમેરિકન વિદેશ મંત્રી માર્કો રુબિયોએ સેનેટમાં ઈરાની ખતરા અંગે ચેતવણી આપી, ઈરાને કહ્યું - ‘મર્યાદિત હુમલો એ માત્ર ભ્રમ છે, અમારો જવાબ તેલ અવીવને હચમચાવી દેશે’

મધ્ય પૂર્વમાં સ્થિતિ અત્યંત તંગ બની રહી છે. તાજેતરના અહેવાલો અનુસાર, અમેરિકા અને ઈરાન વચ્ચે શાબ્દિક યુદ્ધ હવે સૈન્ય સંઘર્ષની નજીક પહોંચી રહ્યું હોય તેવું લાગી રહ્યું છે. 

યુએસ સેનેટની ફોરેન રિલેશન્સ કમિટી સમક્ષ બોલતા, અમેરિકાના વિદેશ મંત્રી (સેક્રેટરી ઓફ સ્ટેટ) માર્કો રુબિયોએ મધ્ય પૂર્વમાં અમેરિકન સૈન્યની હાજરી અને ઈરાન તરફથી તોળાઈ રહેલા ખતરા અંગે ગંભીર નિવેદનો આપ્યા છે. રુબિયોએ સ્પષ્ટ કર્યું હતું કે હાલમાં મધ્ય પૂર્વના આઠથી નવ અલગ અલગ બેઝ પર ૩૦,૦૦૦ થી ૪૦,૦૦૦ જેટલા અમેરિકન સૈનિકો તૈનાત છે. તેમણે સ્વીકાર્યું હતું કે આ તમામ સૈનિકો ઈરાનના હજારો ડ્રોન અને બેલેસ્ટિક મિસાઈલોની રેન્જ (મારક ક્ષમતા)માં છે. જોકે, તેમણે એમ પણ ઉમેર્યું હતું કે અમેરિકા પોતાના સૈનિકોના રક્ષણ માટે ‘પ્રિએમ્પટિવ સ્ટ્રાઈક’ (હુમલો થાય તે પહેલાં જ સામા પક્ષ પર હુમલો કરવો) કરવાનો અધિકાર સુરક્ષિત રાખે છે.

બીજી તરફ, ન્યૂયોર્ક ટાઈમ્સના અહેવાલ મુજબ, અમેરિકા અને યુરોપિયન અધિકારીઓએ ઈરાન સામે યુદ્ધ રોકવા માટે ત્રણ મુખ્ય શરતો મૂકી છે. પહેલી, ઈરાને તેના તમામ સ્થળોએ યુરેનિયમ સંવર્ધન (એનરિચમેન્ટ) કાયમી ધોરણે બંધ કરવું પડશે. બીજી, ઈરાની રિવોલ્યુશનરી ગાર્ડ કોર્પ્સ (આઈઆરજીસી) દ્વારા વિકસાવવામાં આવેલી લાંબા અંતરની બેલેસ્ટિક મિસાઈલોની સંખ્યા અને રેન્જ પર મર્યાદા મૂકવી પડશે. ત્રીજી અને મહત્વની શરત એ છે કે ઈરાને મધ્ય પૂર્વમાં સક્રિય પ્રોક્સી જૂથો જેવા કે હમાસ, હિઝબુલ્લાહ અને યમનના હૂતી વિદ્રોહીઓને અપાતું તમામ સમર્થન બંધ કરવું પડશે.

આ માંગણીઓના જવાબમાં ઈરાન તરફથી પણ આક્રમક પ્રતિક્રિયા આવી છે. ઈરાનના વિદેશ મંત્રી અબ્બાસ અરાઘચીને ચેતવણી આપતા કહ્યું છે કે ઈરાનની સેના ‘ટ્રિગર પર આંગળી’ રાખીને તૈયાર છે. તેમણે કહ્યું કે ઈરાનની જમીન, હવા કે સમુદ્ર પર થતા કોઈપણ આક્રમણનો જડબાતોડ જવાબ આપવામાં આવશે. 

જોકે, તેમણે વાતચીતનો રસ્તો ખુલ્લો રાખતા કહ્યું હતું કે ઈરાન સન્માનજનક શરતો પર પરમાણુ કરાર માટે તૈયાર છે, પરંતુ તે દબાણ કે ધમકી હેઠળ નહીં થાય. 

વધુમાં, ઈરાનના સુપ્રીમ લીડરના સલાહકાર અલી શમખાનીએ ચેતવણી આપી છે કે અમેરિકા કે ઈઝરાયેલ જો ‘મર્યાદિત હુમલા’ (લિમિટેડ સ્ટ્રાઈક) વિશે વિચારી રહ્યા હોય તો તે તેમનો ભ્રમ છે. ઈરાન પર થયેલો નાનો હુમલો પણ પૂર્ણ કક્ષાના યુદ્ધની શરૂઆત માનવામાં આવશે અને તેનો જવાબ તેલ અવીવના મધ્યમાં પહોંચશે.