ચંદીગઢ, તા.29 : પંજાબ અને હરિયાણાની રાજધાની ગણાતા 'સિટી બ્યુટીફુલ' ચંદીગઢમાં આજે મેયરની ચૂંટણીમાં ભાજપે વિજયધ્વજ લહેરાવ્યો છે. ભાજપના યુવા અને શિક્ષિત ઉમેદવાર સૌરભ જોશી 18 મતો મેળવીને ચંદીગઢના નવા મેયર તરીકે ચૂંટાયા છે. ચૂંટણીના પરિણામો જાહેર થતા જ સૌરભ જોશી ભાવુક થઈ ગયા હતા અને આ જીતનો શ્રેય તેમના પિતાના આશીર્વાદને આપ્યો હતો.
વારસામાં મળ્યું છે રાજકારણ અને સેવાનો ભાવ
45 વર્ષીય સૌરભ જોશી કોઈ સામાન્ય નેતા નથી, પણ તેઓ ભાજપના પીઢ નેતા સ્વર્ગસ્થ જયરામ જોશીના પુત્ર છે. જયરામ જોશીને લોકો પ્રેમથી 'ચંદીગઢના મહાત્મા ગાંધી' તરીકે ઓળખતા હતા. સૌરભ જ્યારે મેયરની ચૂંટણી લડવા પહોંચ્યા ત્યારે તેઓ પોતાના પિતાની તસવીર સાથે લાવ્યા હતા. વિજય બાદ તેમણે પિતાની તસવીર સાથે ખુરશી પર બેસીને શ્રદ્ધાંજલિ અર્પી હતી, જે દ્રશ્ય જોઈને ત્યાં હાજર સૌ કોઈની આંખો ભીની થઈ ગઈ હતી.
શિક્ષણ અને સંઘર્ષની જોડી
પંજાબ યુનિવર્સિટીમાંથી કાયદાનો અભ્યાસ કરનાર (LL.B.) સૌરભ જોશીએ પોતાના રાજકીય કરિયરની શરૂઆત વિદ્યાર્થી નેતા તરીકે કરી હતી. ABVP માં સક્રિય રહીને તેમણે કેમ્પસના પ્રશ્નો માટે અવાજ ઉઠાવ્યો હતો. માત્ર 29 વર્ષની નાની ઉંમરે તેઓ પહેલીવાર કાઉન્સિલર તરીકે ચૂંટાયા હતા. RSS ના સંસ્કારોમાં ઉછરેલા સૌરભ આજે બીજી પેઢીના કાર્યકર તરીકે મેયરના સર્વોચ્ચ પદ પર બિરાજમાન થયા છે.
ચૂંટણીનું ગણિત અને ભાજપનું વર્ચસ્વ
ચંદીગઢ મ્યુનિસિપલ કોર્પોરેશનમાં ભાજપ પાસે સૌથી વધુ 18 સભ્યોનું સંખ્યાબળ હોવાથી સૌરભ જોશીની જીત નિશ્ચિત મનાતી હતી. આ ચૂંટણીમાં આમ આદમી પાર્ટીને 11 અને કોંગ્રેસને 6 મતો મળ્યા હતા. સૌરભના મોટા ભાઈ વિનીત જોશી પણ પંજાબના રાજકારણમાં સક્રિય છે અને પૂર્વ મુખ્યમંત્રીના મીડિયા સલાહકાર રહી ચૂક્યા છે.
નવા મેયર તરીકે હવે સૌરભ જોશી સામે ચંદીગઢના વિકાસ અને સુવિધાઓને વધુ બહેતર બનાવવાનો પડકાર રહેશે, જેમાં તેઓ પોતાના પિતાના આદર્શો સાથે આગળ વધવા તૈયાર છે.