નવી દિલ્હી,  : ભારત અને યુરોપિયન યુનિયન (EU) વચ્ચે થયેલો ફ્રી ટ્રેડ એગ્રીમેન્ટ (FTA) માત્ર આર્થિક દસ્તાવેજ નથી, પરંતુ ભારતની વધતી જતી વૈશ્વિક શક્તિનો પુરાવો છે. તાજેતરમાં 'યુરો ન્યૂઝ' પર ચાલી રહેલી એક ઉગ્ર ટીવી ચર્ચામાં આ નજારો જોવા મળ્યો હતો. બે યુરોપિયન સાંસદો વેપારના મુદ્દે એકબીજા સાથે જોરદાર દલીલો કરી રહ્યા હતા, પરંતુ જેવું 'ભારત'નું નામ આવ્યું કે બંનેના સૂર બદલાઈ ગયા. વિરોધી પક્ષના હોવા છતાં, બંને સાંસદોએ એક સ્વરે સ્વીકાર્યું કે યુરોપને ભારત સાથેના આ મજબૂત વેપાર કરારની સખત જરૂર હતી.
શા માટે આ કરારને 'મધર ઓફ ઓલ ડીલ્સ' કહેવાય છે?
લગભગ બે દાયકા (20 વર્ષ) ની લાંબી રાહ અને વાટાઘાટો પછી આ કરારને અંતિમ સ્વરૂપ આપવામાં આવ્યું છે. આ સોદો કેટલો મોટો છે તેનો અંદાજ એ વાત પરથી લગાવી શકાય છે કે:
•    ભારતની 93% નિકાસ હવે યુરોપના 27 દેશોમાં કોઈ પણ જાતની ડ્યુટી (કર) વગર પ્રવેશ મેળવશે.
•    ભારતના કાપડ, ચામડાની વસ્તુઓ અને ફૂટવેર ઉદ્યોગ માટે યુરોપના બજારો ખુલી જશે.
•    સામે પક્ષે, યુરોપની પ્રખ્યાત લક્ઝરી કાર અને વાઇન ભારત આવતા સસ્તા થશે, જેનો સીધો લાભ શોખીન ગ્રાહકોને મળશે.
બે અબજ લોકોનું વિશાળ બજાર
વડા પ્રધાન નરેન્દ્ર મોદીએ આ કરારને 'મહત્વાકાંક્ષી ભારત' માટેની એક મોટી તક ગણાવી છે. આ સોદા દ્વારા વિશ્વનું ચોથું સૌથી મોટું અર્થતંત્ર (ભારત) અને વિશ્વનું બીજું સૌથી મોટું આર્થિક એકમ (EU) સાથે આવશે, જેનાથી આશરે બે અબજ લોકોનું એક સમાન બજાર તૈયાર થશે. વડાપ્રધાને ઉદ્યોગ જગતને આહવાન કર્યું છે કે તેઓ આ તકનો પૂરેપૂરો લાભ ઉઠાવે અને વૈશ્વિક બજારમાં 'મેડ ઈન ઈન્ડિયા'નો ડંકો વગાડે.
આ કરાર માત્ર વેપાર જ નહીં, પણ લાખો નવી નોકરીઓનું સર્જન કરશે અને ભારતને વિશ્વનું મેન્યુફેક્ચરિંગ હબ બનાવવાની દિશામાં માઈલસ્ટોન સાબિત થશે.