અમદાવાદ:  જ્યારે પણ વજન ઘટાડવાની વાત આવે ત્યારે લોકો સૌથી પહેલા ટ્રેડમિલ પર દોડવાનું અથવા કલાકો સુધી સાયકલિંગ કરવાનું વિચારે છે. પરંતુ ૨૦ વર્ષનો અનુભવ ધરાવતા જાણીતા ફિટનેસ કોચ ડેન ગોએ આ આખી માન્યતાને જડમૂળથી હચમચાવી દીધી છે. તેમના મતે, વજન ઘટાડવા માટે માત્ર કાર્ડિયો પર આધાર રાખવો એ એક 'ખરાબ રણનીતિ' છે. કાર્ડિયો ચોક્કસપણે તમારા હૃદય અને ફેફસાના સ્વાસ્થ્ય માટે ઉત્તમ છે, પરંતુ તે શરીરમાંથી કેલરી બર્ન કરવાની પ્રક્રિયામાં એટલું અસરકારક નથી જેટલું લોકો માને છે. હકીકતમાં, આપણું શરીર ખૂબ જ જલ્દી કાર્ડિયોની આદત પાડી દે છે, જેના પરિણામે લાંબા ગાળે તે ઓછી કેલરી બર્ન કરવાનું શરૂ કરે છે.

કાર્ડિયોના ગેરફાયદા ગણાવતા નિષ્ણાતો કહે છે કે વધુ પડતી દોડાદોડીથી શરીરના સ્નાયુઓ ઘટવા લાગે છે. સ્નાયુઓ ઘટવાથી મેટાબોલિઝમ ધીમું પડી જાય છે, જે વજન ઘટાડવાની પ્રક્રિયાને અટકાવી દે છે. આ ઉપરાંત, કલાકો સુધી કાર્ડિયો કરવાથી શરીરમાં એવા હોર્મોન્સ સક્રિય થાય છે જે તમારી ભૂખમાં અસહ્ય વધારો કરે છે. પરિણામે, જીમમાંથી બહાર નીકળ્યા પછી તમે બર્ન કરેલી કેલરી કરતાં વધુ ખોરાક ખાઈ લો છો. ડેન ગોના મતે, કાર્ડિયો દ્વારા ઘટાડેલું વજન જાળવી રાખવું અત્યંત મુશ્કેલ છે કારણ કે તે માટે તમારે દરરોજ એ જ માત્રામાં મહેનત કરવી પડે છે, જે લાંબા ગાળે ઈજાનું જોખમ વધારે છે.

તો પછી સવાલ એ થાય કે વજન ઘટાડવા માટે શ્રેષ્ઠ શું છે? નિષ્ણાતો 'વેઈટ ટ્રેઈનિંગ' (વજન ઉપાડવું) અને 'વર્કિંગ' (ચાલવું) ને સૌથી અસરકારક માને છે. વજન ઉપાડવાથી શરીરમાં સ્નાયુઓ બને છે, જે આરામ કરતી વખતે પણ કેલરી બર્ન કરવામાં મદદ કરે છે અને ઇન્સ્યુલિન સેન્સિટિવિટી સુધારે છે. બીજી તરફ, રોજિંદા જીવનમાં વધુ ચાલવું એ સાંધા પર દબાણ લાવ્યા વગર ચરબી ઓગાળવાનો સૌથી સલામત રસ્તો છે. જો તમે ખરેખર લાંબા ગાળા માટે ફિટ રહેવા માંગતા હોવ, તો જીમમાં ટ્રેડમિલ પર સમય બગાડવાને બદલે સ્ટ્રેન્થ ટ્રેઈનિંગ અને સક્રિય જીવનશૈલી પર ધ્યાન આપવું વધુ હિતાવહ છે.