નવી દિલ્હી:  યુનિવર્સિટી ગ્રાન્ટ્સ કમિશન (UGC) દ્વારા ઉચ્ચ શૈક્ષણિક સંસ્થાઓમાં જાતિ આધારિત ભેદભાવ રોકવા માટે લાવવામાં આવેલા નવા નિયમો પર સુપ્રીમ કોર્ટે સ્ટે મૂકી દેતા દેશના રાજકારણમાં ગરમાવો આવી ગયો છે. કેન્દ્રીય મંત્રી ગિરિરાજ સિંહે આ નિર્ણયને 'સનાતન ધર્મ' ને વિભાજીત થતો અટકાવનારો ગણાવીને તેનું ભવ્ય સ્વાગત કર્યું છે. ગિરિરાજ સિંહે સોશિયલ મીડિયા પર પીએમ નરેન્દ્ર મોદી અને ગૃહમંત્રી અમિત શાહનો આભાર માનતા જણાવ્યું હતું કે, આ સ્ટે ભારતની સાંસ્કૃતિક એકતા અને બંધારણીય મૂલ્યોના રક્ષણ માટે અત્યંત જરૂરી હતો. નોંધનીય છે કે, UGC ના આ નિયમોને કારણે ઉચ્ચ જાતિના સંગઠનોમાં ભારે રોષ જોવા મળી રહ્યો હતો, જેમને ડર હતો કે આ નિયમોનો તેમની વિરુદ્ધ દુરુપયોગ થઈ શકે છે.

આ વિવાદની શરૂઆત ત્યારે થઈ જ્યારે UGC એ SC, ST અને OBC વિદ્યાર્થીઓ સાથેના ભેદભાવને રોકવા માટે કોલેજોમાં 'સમાનતા સમિતિ'  બનાવવાની જોગવાઈ કરી હતી. જોકે, સુપ્રીમ કોર્ટમાં દાખલ કરાયેલી જાહેર હિતની અરજીમાં દલીલ કરવામાં આવી હતી કે આ નિયમો સમાજમાં ઊંડી ખાઈ પેદા કરી શકે છે. સુનાવણી દરમિયાન સર્વોચ્ચ અદાલતે પણ ટિપ્પણી કરી હતી કે જો આ મામલે સમયસર હસ્તક્ષેપ નહીં કરવામાં આવે, તો ભવિષ્યમાં શૈક્ષણિક સંસ્થાઓમાં જાતિવાદનું ઝેર વધુ પ્રસરી શકે છે. કોર્ટે સરકારને આ નિયમોની પુનઃ સમીક્ષા કરવા અને નવી સમિતિ બનાવવાનો આદેશ આપતા હાલ પૂરતી રોક લગાવી દીધી છે.

રાજકીય રીતે આ ઘટનાક્રમ વધુ ચર્ચામાં રહ્યો કારણ કે ગિરિરાજ સિંહે પોતાની પ્રથમ ફેસબુક પોસ્ટમાં સ્પષ્ટપણે 'સનાતન ધર્મને વિભાજીત કરતા નિયમો' એવા શબ્દો વાપર્યા હતા, જેને થોડી વાર બાદ ડિલીટ કરીને નવેસરથી ટ્વીટ કરવામાં આવી હતી. નવી પોસ્ટમાં તેમણે વધુ સંતુલિત ભાષામાં 'સૌનો સાથ, સૌનો વિકાસ' અને બંધારણીય રક્ષણની વાત કરી હતી. વિપક્ષી નેતાઓ આ સ્ટેને પછાત વર્ગોના અધિકારો પર તરાપ ગણાવી રહ્યા છે, જ્યારે સત્તાધારી પક્ષના સમર્થકો તેને સમાનતા અને સામાજિક સંતુલન જાળવવાનું મહત્વનું પગલું ગણાવી રહ્યા છે. હવે સરકાર આ નિયમોમાં કેવા સુધારા કરે છે તે જોવું રસપ્રદ રહેશે.